Ashish Vidyarthi Accident: भारतीय चित्रपटसृष्टीतील दिग्गज अभिनेते आशिष विद्यार्थी आणि त्यांची पत्नी रूपाली बरुआ एका रस्ते अपघातात जखमी झाल्याची खळबळजनक घटना घडली आहे. शुक्रवारी रात्री उशिरा गुवाहाटीतील ‘झू रोड’ परिसरात हा अपघात झाला. या घटनेमुळे मनोरंजन विश्वात चिंतेचे वातावरण पसरले आहे.
मध्यरात्री हॉटेलबाहेरच घडली दुर्घटना
मिळालेल्या माहितीनुसार, आशिष विद्यार्थी आणि रूपाली बरुआ गुवाहाटीतील ‘अॅड्रेस हॉटेल’मध्ये मुक्कामाला होते. रात्री 12:00 वाजण्याच्या सुमारास जेवण आटोपून हे जोडपे हॉटेलबाहेर रस्ता ओलांडत होते. त्याच वेळी चांदमारी भागातून येणाऱ्या एका भरधाव दुचाकीने त्यांना जोरदार धडक दिली. या धडकेत आशिष विद्यार्थी आणि त्यांची पत्नी दोघेही जखमी झाले, तर दुचाकीस्वार देखील गंभीर जखमी झाला आहे.
पोलीस कारवाई आणि उपचार
घटनेची माहिती मिळताच गीतानगर पोलिसांनी तातडीने घटनास्थळी धाव घेतली. जखमी दुचाकीस्वाराला उपचारासाठी गुवाहाटी मेडिकल कॉलेजमध्ये दाखल करण्यात आले आहे. सुदैवाने, आशिष विद्यार्थी आणि रूपाली बरुआ यांच्यावरही त्वरित प्रथमोपचार करण्यात आले असून त्यांची प्रकृती आता स्थिर असल्याचे समजते.
आशिष विद्यार्थी हे केवळ हिंदीच नव्हे, तर दाक्षिणात्य चित्रपटसृष्टीतील एक मोठे नाव आहे. त्यांनी आतापर्यंत 11 हून अधिक भाषांमधील 300 पेक्षा जास्त चित्रपटांमध्ये आपल्या अभिनयाचा ठसा उमटवला आहे. 1994 मध्ये आलेल्या ‘द्रोहकाल’ चित्रपटातील दमदार भूमिकेसाठी त्यांना राष्ट्रीय चित्रपट पुरस्काराने सन्मानित करण्यात आले होते. ‘वास्तव’, ‘बर्फी’ आणि ‘हैदर’ सारख्या चित्रपटांतील त्यांच्या खलनायकी भूमिका प्रचंड गाजल्या. अभिनयाव्यतिरिक्त, ते एक उत्तम वक्ता आणि लोकप्रिय फूड-ट्रॅव्हल व्लॉगर आहेत.
