Tushar Apte Resignation: बदलापूर येथील चिमुरड्यांवरील लैंगिक अत्याचार प्रकरणातील सहआरोपी तुषार आपटे यांनी अखेर आपल्या ‘स्वीकृत नगरसेवक’ पदाचा राजीनामा दिला आहे. अवघ्या २४ तासांत जनसामान्यांचा वाढता संताप आणि विरोधकांनी घेरल्यामुळे भाजपला हे पाऊल उचलणे भाग पडले आहे. आपटे यांनी आपला राजीनामा पक्षाच्या वरिष्ठांकडे सोपवला आहे.
नियुक्तीनंतर अवघ्या एका दिवसात माघार
कुळगाव-बदलापूर नगरपालिकेच्या कार्यकारी बैठकीत कालच तुषार आपटे यांची स्वीकृत नगरसेवक म्हणून निवड करण्यात आली होती. मात्र, एका ‘पॉक्सो’ (POCSO) अंतर्गत गुन्ह्यातील आरोपीला अशा प्रकारे राजकीय सन्मान दिल्याने संपूर्ण राज्यातून भाजपवर टीकेची झोड उठली. ही निवड रद्द न केल्यास महाराष्ट्र नवनिर्माण सेनेने (मनसे) १३ किंवा १४ जानेवारीला बदलापूरमध्ये भव्य मोर्चा काढण्याचा इशारा दिला होता. मनसे नेते अविनाश जाधव यांच्या इशाऱ्यामुळे आणि वाढत्या दबावामुळे भाजपने अखेर डॅमेज कंट्रोल करत आपटेंचा राजीनामा घेतला.
राजकीय नाचक्की आणि विरोधकांचा प्रहार
दरम्यान, ठाकरे गट नेते संजय राऊत यांनी ‘लैंगिक अत्याचाराच्या आरोपीला भाजपने बक्षीस दिले आहे का?’ असा धारदार सवाल संजय राऊत यांनी उपस्थित केला होता. आगामी निवडणुकांच्या तोंडावर या नियुक्तीमुळे भाजपची मोठी नाचक्की झाली. पक्षाची प्रतिमा डागाळत असल्याचे लक्षात आल्यावर प्रदेशाध्यक्ष चंद्रशेखर बावनकुळे यांनीही दोषींवर निष्पक्ष कारवाई होईल, असे संकेत दिले होते.
काय म्हटले आहे राजीनामा पत्रात?
तुषार आपटे यांनी आपल्या पत्रात नमूद केले की, ‘मी कुळगाव बदलापूर नगरपरिषदेच्या स्वीकृत सदस्य पदाचा आज 10 जानेवारी 2026 रोजी स्वखुशीने राजीनामा देत आहे, तो स्वीकारावा.’ सध्या आपटे जामिनावर बाहेर असले तरी, त्यांच्यावरील आरोपांचे गांभीर्य पाहता ही नियुक्ती भाजपसाठी मोठी डोकेदुखी ठरली होती.
