मुंबई : राज्यातील जिल्हा परिषद निवडणुकांबाबत (ZP Election) मोठी कायदेशीर घडामोड समोर आली आहे. महापालिका निवडणुकांच्या रणधुमाळीत 12 जिल्हा परिषदेच्या निवडणुका लवकर होण्याची शक्यता वर्तवली जात होती. मात्र आता या निवडणुका पुन्हा लांबणीवर पडण्याची चिन्हं दिसत आहेत.
सर्व जिल्हा परिषद निवडणुका एकाच टप्प्यात घ्याव्यात, अशी मागणी करणारी नवी याचिका सर्वोच्च न्यायालयात दाखल करण्यात आली आहे. या याचिकेवर येत्या सोमवारी सुनावणी होणार असून, त्याचा थेट परिणाम जिल्हा परिषद निवडणुकांच्या वेळापत्रकावर होण्याची शक्यता आहे.
राज्य निवडणूक आयोगाकडून 50 टक्क्यांच्या आत आरक्षण असलेल्या 12 जिल्हा परिषद आणि 125 पंचायत समित्यांच्या निवडणुकांची तयारी सुरू असल्याची माहिती समोर आली होती. मात्र सर्वोच्च न्यायालयात दाखल झालेल्या या नव्या याचिकेमुळे निवडणूक प्रक्रिया पुन्हा अडचणीत येण्याची शक्यता व्यक्त केली जात आहे.
याचिकाकर्त्यांनी राज्यातील सर्व 32 जिल्हा परिषदांच्या निवडणुका एकाच वेळी घेण्यात याव्यात, असा दावा न्यायालयात केला आहे. त्यामुळे न्यायालयाचा निकाल काय येतो, याकडे राजकीय वर्तुळासह राज्य निवडणूक आयोगाचेही लक्ष लागले आहे.
