Indapur College: सावित्रीबाई फुले पुणे विद्यापीठ, पुणे कला, विज्ञान आणि वाणिज्य महाविद्यालय, इंदापूर रत्नप्रभादेवी महाविद्यालय, बावडा यांच्या संयुक्त विद्यमाने आयोजित विशेष हिवाळी शिबिरामध्ये कला विज्ञान आणि वाणिज्य महाविद्यालय इंदापूर राज्यशास्त्र विभागाद्वारे “जागर संविधानाचा” हे पथनाट्य रेडा या गावात आणि शिबिराच्या ठिकाणी सादर करण्यात आले.
संविधानातील हक्कांची प्रभावी मांडणी
या पथनाट्याच्या माध्यमातून राज्यशास्त्र विभागाच्या विद्यार्थ्यांनी संविधानाविषयी गावातील लोकांमध्ये जनजागृती केली. वेग-वेगळ्या प्रसंगाच्या माध्यमातून संविधानामध्ये अंतर्भूत असलेले मूलभूत हक्क, अल्पसंख्यांकांचे हक्क, स्त्रियांचे हक्क याविषयी पथनाट्याच्या माध्यमातून लोकांना माहिती दिली. संविधान मूल्य आपल्या सर्वांच्या जगण्याचा भाग झाले पाहिजेत. प्रत्येकाने वैज्ञानिक दृष्टिकोन व संविधानिक मूल्य अंगीकारले पाहिजे यासाठी अशा पथनाट्याची आवश्यकता आहे.
हेही वाचा – राज्यस्तरीय उत्कर्ष स्पर्धेत इंदापूर महाविद्यालयाचा आवाज घुमला; सरदार मुलाणीचा लोककलेत द्वितीय क्रमांक
वैज्ञानिक दृष्टिकोनावर भर
भारतीय संविधान हे प्रत्येक भारतीय व्यक्तीला समतेचा हक्क, स्वातंत्र्याचा हक्क, धार्मिक हक्क, शैक्षणिक व सांस्कृतिक हक्क व शोषणाविरुद्धचा हक्क देते या हक्काविषयी गावागावांमध्ये अशा पथनाट्याच्या माध्यमातून जाणीव जागृती करण्याचा अभिनव उपक्रम राज्यशास्त्र विभागाने केलेला आहे. राज्यशास्त्र विभाग प्रमुख डॉ. दिगंबर बिरादार यांनी या पथनाट्याला मार्गदर्शन केले.तसेच डॉ. नामदेव पवार,डॉ. गणेश मोरे, प्रा. नम्रता निंबाळकर यांचे सहकार्य लाभले.
