Akola Politics : अकोला जिल्ह्यातील अकोटमध्ये राजकीय वातावरण चांगलेच तापले असून एमआयएमच्या पाचही नगरसेवकांवर पक्षाने कठोर कारवाईचा इशारा दिला आहे. पक्षविरोधी भूमिका घेतल्याचा ठपका ठेवत एमआयएमकडून पाचही नगरसेवकांना कारणे दाखवा नोटीस बजावण्यात आली आहे. भाजप समर्थित गटाला सहकार्य करत स्वीकृत नगरसेवकाच्या निवडीत पाठिंबा दिल्यामुळे ही कारवाई करण्यात आली आहे.
अकोटमध्ये यापूर्वी भाजप-एमआयएम युतीमुळे वाद निर्माण झाला होता. त्यानंतर युती तुटल्याचे सांगण्यात आले होते. मात्र आता एमआयएमच्या नगरसेवकांनी भाजपचे माजी नगराध्यक्ष रामचंद्र बरेठिया यांचे पुत्र जितेन बरेठिया यांना समर्थन दिल्याने अप्रत्यक्ष युतीची चर्चा पुन्हा रंगली आहे. या घटनेमुळे विरोधकांनी जोरदार टीका सुरू केली असून एमआयएममधील अंतर्गत नाराजी उघड झाली आहे.
दरम्यान, जितेन बरेठीया याचा भाजपशी संबंध नाही. भाजपला बदनाम करण्याचा कट रचला जात आहे, असा आरोप आमदार भारसाकळे यांनी केला होता. जितेन बरेठिया यांचे वडील रामचंद्र बरेठिया अजूनही भाजपचे नेते असल्याची माहिती मिळत असून त्याचे पुरावे देखील समोर आले आहेत.
आमदार भारसाकळे यांच्याशी जवळीक संबंध असल्याचे फोटो देखील समोर आलेले आहेत. एमआयएमकडून स्विकृत नगरसेवकपदी भाजपच्या नेत्याच्या मुलाची निवड झाल्याने विरोधकांकडून टीका होत आहे.
रेश्मा परवीन मोहम्मद अजीम, युसुफ खान हादीक खान, दिलशाद बी रज्जाक खा, अफरीन अंजुम मो. शरफोद्दिन, हन्नान शाह सुलतान शाह अशी एमआयएमच्या या पाच ५ नगरसेवकांची नावं आहेत.
