नवी दिल्ली : नवीन वर्ष सुरु झाल्यानंतर फेब्रुवारी महिन्याची उत्सुकता असते. कारण, याच महिन्यात केंद्रीय अर्थसंकल्प अर्थात बजेट सादर केला जातो. यावेळी, केंद्रीय अर्थसंकल्प रविवारी १ फेब्रुवारी रोजी सादर केला जाईल. याची अधिकृत घोषणाही करण्यात आली आहे. अर्थसंकल्पीय अधिवेशन २८ जानेवारीपासून सुरू होईल. या दिवशी राष्ट्रपती द्रौपदी मुर्मू संसदेच्या दोन्ही सभागृहांना संबोधित करतील.
अर्थसंकल्पीय तयारीचे काम अर्थसंकल्पीय सादरीकरणाच्या सुमारे चार महिने आधी सुरू होते. अर्थ मंत्रालयाच्या अंतर्गत येणाऱ्या आर्थिक व्यवहार विभागाचा अर्थसंकल्पीय विभाग या संपूर्ण प्रक्रियेसाठी जबाबदार आहे. हा विभाग सर्व मंत्रालयांकडून पुढील आर्थिक वर्षाच्या योजना आणि गरजांची माहिती मागवतो. या विनंत्यांचा आढावा घेतल्यानंतर, सरकार प्रत्येक मंत्रालयाला किती बजेट वाटप करायचे हे ठरवते. केंद्रीय अर्थसंकल्प तयार करण्याच्या प्रक्रियेत, सरकार जनतेशी तसेच उद्योग नेते, अर्थतज्ज्ञ, कामगार संघटना आणि शेतकरी गटांच्या प्रतिनिधींची मते विचारात घेते.
तसेच देशातील आघाडीचे उद्योग मंडळे देखील अर्थसंकल्पासाठीच्या त्यांच्या अपेक्षा अर्थ मंत्रालयाकडे सादर करतात. सरकार या अपेक्षांचा आढावा घेते. अर्थसंकल्पाची रूपरेषा पूर्ण झाल्यानंतर, अर्थमंत्री पंतप्रधानांना माहिती देतात. पंतप्रधानांच्या मंजुरीनंतर, केंद्रीय अर्थसंकल्प अंतिम केला जातो.
