Nashik Municipal Election: नाशिक महानगरपालिकेच्या रणधुमाळीत आज मतदानाचा उत्साह असतानाच ‘सावता नगर’ परिसरात प्रचंड तणाव निर्माण झाला. भाजप नेते सुधाकर बडगुजर यांच्या संपर्क कार्यालयाबाहेर पैसे वाटप होत असल्याच्या संशयावरून अपक्ष उमेदवार मुकेश शहाणे यांनी समर्थकांसह तिथे धडक दिली. यावेळी दोन्ही बाजूचे कार्यकर्ते एकमेकांसमोर आल्याने जोरदार घोषणाबाजी झाली आणि परिस्थिती चिघळली. कार्यालयावर चाल केल्यामुळे निर्माण झालेला हा वाद विकोपाला गेल्याने परिसरात दहशतीचे वातावरण निर्माण झाले होते. अखेर पोलिसांनी हस्तक्षेप करत जमावावर सौम्य लाठीमार केला आणि कार्यकर्त्यांना पांगवून परिस्थिती नियंत्रणात आणली.
नाशिक महानगरपालिका निवडणूक: आकडेवारीचा आढावा
नाशिकमधील एकूण 122 जागांसाठी आज मतदान प्रक्रिया पार पडत असून, सकाळपासूनच नागरिकांमध्ये उत्साह पाहायला मिळत आहे. नाशिक शहरात एकूण 13,60,722 मतदार असून त्यांच्यासाठी 1,563 मतदान केंद्रे उभारण्यात आली आहेत. मतदारांच्या विभाजनात 7,03,968 पुरुष तर 6,56,675 महिला मतदारांचा समावेश आहे. सकाळी 11:30 वाजेपर्यंत शहरात 14.31 टक्के इतके मतदान झाले असून दुपारनंतर मतदानाचा वेग वाढण्याची शक्यता वर्तवण्यात येत आहे.
पारदर्शकतेवरून विरोधक आक्रमक
मतदानाच्या दिवशीच पैसे वाटपासारखे गंभीर आरोप झाल्याने नाशिकच्या राजकीय वर्तुळात मोठी खळबळ उडाली आहे. या प्रकरणाची प्रशासनाने सखोल चौकशी करून दोषींवर तातडीने कारवाई करावी, अशी मागणी विरोधी पक्षांनी आणि अपक्ष उमेदवारांनी लावून धरली आहे. “निवडणूक पारदर्शक पद्धतीने होणे गरजेचे आहे; पैशांचा वापर करून लोकशाही विकत घेण्याचा प्रयत्न खपवून घेतला जाणार नाही,” असा इशारा मुकेश शहाणे यांनी दिला आहे. दरम्यान, पोलीस या आरोपांमधील सत्यता पडताळून पाहत असून परिसरात चोख बंदोबस्त तैनात करण्यात आला आहे.
