चुकीच्या खाण्याच्या सवयी, अनियमित जीवनशैली आणि वाढता ताण यांचा आपल्या केसांवर विनाशकारी परिणाम होत आहे. सामान्य केसगळती ही एक गोष्ट आहे, पण जेव्हा टाळूवर अचानक गोलाकार, उघडे ठिपके दिसू लागतात, तेव्हा ते अलोपेसिया एरियाटाचे (Alopecia Areata) लक्षण असू शकते. ही एक अशी स्थिती आहे ज्यात शरीराची रोगप्रतिकारशक्ती स्वतःच्याच केसांच्या मुळांवर हल्ला करते. यावर कोणताही कायमस्वरूपी इलाज नसला तरी, त्यावर प्रभावीपणे नियंत्रण मिळवता येते.
काही आयुर्वेदिक आणि घरगुती उपाय मदत करतात असा दावा केला जातो. त्यात कांद्याचा रस हा केस पुन्हा उगवण्यासाठी एक जुना आणि विश्वासार्ह उपाय मानला जातो. कांद्यामधील उच्च सल्फरचे प्रमाण टाळूतील रक्तसंचार उत्तेजित करते, ज्यामुळे केसांच्या मुळांना पोषण मिळते. याचा वापर करण्यासाठी, एक कांदा वाटून त्याचा रस काढा आणि तो प्रभावित भागावर १५-२० मिनिटांसाठी लावा. नियमित वापरामुळे तुम्हाला काही आठवड्यांतच लहान केस वाढताना दिसू शकतात.
कांद्याप्रमाणेच, लसणामध्ये सल्फर भरपूर प्रमाणात असते. ते केवळ संसर्ग टाळत नाही, तर केसांच्या वाढीसाठी आवश्यक असलेल्या कोलेजनच्या निर्मितीलाही चालना देते. लसणाच्या पाकळ्या वाटून घ्या, त्यात थोडे खोबरेल तेल घाला, ते हलके गरम करा आणि विरळ झालेल्या भागावर मालिश करा. यामुळे केसांची मुळे मजबूत होण्यास मदत होते.
खोबरेल तेल आणि कढीपत्ता
खोबरेल तेल केसांसाठी एक वरदान आहे. कढीपत्त्यासोबत शिजवल्यावर ते एक शक्तिशाली टॉनिक बनते. कढीपत्त्यातील अँटीऑक्सिडंट्स आणि अमिनो ॲसिड्स केस गळणे कमी करतात. आठवड्यातून दोनदा या मिश्रणाने डोक्याला मालिश केल्याने टाळूचा कोरडेपणा दूर होतो आणि नवीन केस वाढण्याची शक्यता वाढते.
कोरफड जेल
कोरफडीमध्ये प्रोटिओलिटिक एन्झाइम्स असतात जे टाळूवरील मृत त्वचेच्या पेशी दुरुस्त करण्यास मदत करतात. ते टाळूची पीएच पातळी देखील संतुलित करते. शुद्ध कोरफड जेल थेट टाळूवर लावा. ते केसांच्या मुळांमधील अडथळे दूर करते आणि सूज कमी करते, ज्यामुळे केसगळतीची लक्षणे सुधारतात
