Extra Summer Buses: उन्हाळ्याची सुट्टी, लग्नसराई आणि गावी जाण्याची लगबग लक्षात घेऊन पुणे एसटी विभागाने प्रवाशांना मोठे ‘समर गिफ्ट’ दिले आहे. ऐन गर्दीच्या हंगामात खाजगी ट्रॅव्हल्सकडून होणारी प्रवाशांची लूट थांबवण्यासाठी आणि प्रवास सुलभ करण्यासाठी विभागाने ७४ अतिरिक्त बस रस्त्यावर उतरवण्याचा महत्त्वपूर्ण निर्णय घेतला आहे.
कधीपासून सुरू होणार सेवा?
पुणे एसटी विभागाने प्रवाशांची गर्दी विभागण्यासाठी १० एप्रिल ते १० जून २०२६ या दोन महिन्यांच्या कालावधीसाठी विशेष नियोजन केले आहे. शाळा-महाविद्यालयांना लागलेली सुट्टी, कामगार आणि नोकरदारांचा गावी जाण्याचा ओढ लक्षात घेऊन या गाड्यांचे वेळापत्रक आखण्यात आले आहे.
या प्रमुख मार्गांवर धावणार ‘लालपरी’:
पुण्यातील विविध स्थानकांवरून खालील महत्त्वाच्या शहरांसाठी आणि तीर्थक्षेत्रांसाठी जादा बसेस उपलब्ध असतील:
तीर्थक्षेत्रे: अक्कलकोट, पंढरपूर, सप्तशृंगी गड, गोंदवले.
प्रमुख शहरे: कोल्हापूर, तासगाव, जळगाव, अकोला, अहमदपूर.
खाजगी ट्रॅव्हल्सच्या ‘लुटमारी’पासून सुटका
उन्हाळ्यात प्रवाशांची संख्या वाढली की खाजगी ट्रॅव्हल्सचालक अव्वाच्या सव्वा तिकीट दर आकारतात. एसटी प्रशासनाच्या या निर्णयामुळे सामान्य प्रवाशांना खिशाला परवडणाऱ्या दरात आणि सुरक्षितपणे प्रवास करता येणार आहे. रेल्वेचे आरक्षण मिळत नसल्याने हतबल झालेल्या प्रवाशांसाठी या ७४ जादा गाड्या मोठा आधार ठरणार आहेत.
