पुणे: पिंपरी-चिंचवड शहरातील सांगवी येथील बेपत्ता तरुणीचा मावळ तालुक्यातील लोहगड येथे किल्ल्याच्या पायथ्याशी मृतदेह आढळला. यामुळे पुण्यासह राज्यभरातून हळहळ व्यक्त केली जात आहे. तिने नैराश्यातून गडावरून उडी मारत आपल्या आयुष्याचा शेवट केल्याचे आता समोर आले आहे. गेल्या वर्षी या तरुणीचे अपेन्डीक्सचं ऑपरेशन करण्यात आले होते. या आजारपणामुळे ती एलएलबीच्या तिसऱ्या वर्षाच्या परीक्षेला बसू शकली नव्हती. यामुळे तिनेआपले जीवन संपवल्याचे उघड झाले आहे.
मानसी प्रशांत गोविंदपुरकर (वय 21, रा. सांगवी) असे मृतदेह आढळलेल्या तरुणीचे नाव आहे. याप्रकरणी तिचे मामा अगस्ती पुरुषोत्तम गोवर्धन (वय 48 वर्षे, व्यवसाय नोकरी, रा. ४०३ रसाळ हाईटस्, सहयाद्री कॉलनी, पिंपळे गुरव) यांनी याबाबत फिर्याद दिली होती.
मानसी मंगळवारपासून (दि. 19) बेपत्ता होती. मंगळवारी सकाळी ती कॉलेजला जाण्यासाठी घरातून गेली. परंतु संध्याकाळ झाली, तरी ती घरी परतली नाही. तिच्या कुटुंबातील सदस्यांनी तिच्याशी संपर्क साधण्याचा प्रयत्न केला. मात्र, तिच्या संपर्क होऊ शकला नाही. अखेर नातेवाईकांनी मानसी बेपत्ता झाल्याची तक्रार सांगवी पोलीस ठाण्यात दाखल केली.
नातेवाईकांनी तक्रार दिल्यानंतर पोलिसांनी मानसीच्या मैत्रिणींकडे देखील विचारपूस करून माहिती घेतली. परंतु, तिच्याबद्दल कोणतीही माहिती पोलिसांना मिळाली नाही. शेवटी पोलिसांनी मानसीच्या तांत्रिक विश्लेषण करून तिच्या मोबाईलचे लोकेशन काढले. त्यावेळी तिचे शेवटीचे लोकेशन हे लोहगडावर असल्याचे आढळून आले. त्यानुसार पोलिसांनी गडावरील सीसीटीव्ही फुटेज तपासले. त्यावेळी लोहगडावर जातानाच्या तिकीट काउंटरवरील सीसीटीव्ही कॅमेऱ्यात मानसी दिसून आली. त्यामध्ये ती लोहगडावर जाताना तर दिसली, मात्र परत खाली येताना काही दिसली नाही. पोलीस, मानसीचे नातेवाईक आणि शिवदुर्ग रेस्क्यू टीमच्या सदस्यांनी लोहगड परिसरात तिचा शोध घेण्यात आला. गडाच्या पायथ्याशी असलेल्या घेरेवाडीकडील बाजूला नवग्रह मंदिराच्या जवळ झाडाझुडपात तिचा मृतदेह आढळून आला.
त्यानंतर मानसीचा मृतदेह लोणावळा ग्रामीण पोलिसांकडे सुपूर्द करण्यात आला. गेल्यावर्षी वर्षी तीचे अपेन्डीक्सचे ऑपरेशन झाले होते. त्यामुळे तिला एलएलबीच्या तिसऱ्या वर्षाच्या परीक्षेला बसता आले नव्हते. यातून आलेल्या नैराश्यामुळे तिने आयुष्याचा शेवट केला असल्याचे समोर आले आहे.
