Pune Crime: वरकरणी अत्यंत झगमगाटी आणि सुबत्ता असलेल्या आयटी (IT) क्षेत्रातील एका वरिष्ठ कर्मचाऱ्याने मानसिक छळाला कंटाळून आपले आयुष्य संपवल्याची धक्कादायक घटना पुण्यात उघडकीस आली आहे. हिंजवडी येथील नामांकित ‘टाटा कन्सल्टन्सी सर्व्हिसेस’ (TCS) कंपनीत कार्यरत असलेल्या ४८ वर्षीय अमित अभय ब्रह्मे यांनी राहत्या घरी गळफास घेऊन आत्महत्या केली. कामाच्या ठिकाणी होणारा सततचा अपमान आणि मानसिक त्रासामुळेच हे पाऊल उचलत असल्याचे त्यांनी लिहून ठेवल्याचे समोर आले आहे.
तीन वरिष्ठ सहकाऱ्यांवर संशय; पोलिसांत गुन्हा दाखल
भोसरी पोलिसांनी दिलेल्या माहितीनुसार, या दुर्दैवी घटनेप्रकरणी मृत अमित यांच्या १९ वर्षीय मुलाने, अनिश ब्रह्मे याने पोलीस ठाण्यात रीतसर तक्रार नोंदवली आहे. अमित यांना आत्महत्येस प्रवृत्त केल्याचा ठपका ठेवत पोलिसांनी कंपनीतीलच तीन जणांविरुद्ध गुन्हा दाखल केला आहे. विनोद जेठाल पालीचा, अर्चना आणि शाश्वती अशी गुन्हा दाखल झालेल्या संशयित सहकाऱ्यांची नावे आहेत.
खोट्या आरोपांचे राजकारण आणि छळवणूक
अमित यांच्या कुटुंबीयांनी आणि सुसाईड नोटमधील मजकुराच्या आधारे सांगितले की, कंपनीतील काही वरिष्ठ आणि सहकाऱ्यांनी अमित यांच्याविरुद्ध संगनमत केले होते. त्यांच्यावर कामाच्या ठिकाणी वारंवार खोटे आरोप केले जात होते, तसेच राजकारण करून त्यांना मानसिकदृष्ट्या खच्ची करण्याचा प्रयत्न केला जात होता. या रोजच्या अपमानास्पद वागणुकीला आणि छळाला कंटाळून अखेर अमित यांनी घरात कोणी नसताना टोकाचा निर्णय घेतला.
आयटी क्षेत्रातील ‘वर्क कल्चर’ पुन्हा चर्चेत
या धक्कादायक घटनेमुळे आयटी कंपन्यांमधील कामाचा ताण, अंतर्गत राजकारण आणि कर्मचाऱ्यांच्या मानसिक आरोग्याचा प्रश्न पुन्हा एकदा ऐरणीवर आला आहे. भोसरी पोलीस स्टेशनचे पोलीस उपनिरीक्षक केतन मांजरे या प्रकरणाचा सखोल तपास करत असून, संशयित तिघांची चौकशी सुरू करण्यात आली आहे.
