वरोरा (चंद्रपूर): शहराच्या मध्यवर्ती भागातील गांधीसागर तलाव परिसरात एका तरुणाने चॉकलेटचे आमिष दाखवून चार वर्षीय बालकासोबत अनैसर्गिक कृत्य केल्याची धक्कादायक घटना २१ जुलै रोजी सायंकाळच्या सुमारास उघडकीस आली. या प्रकरणी पीडित बालकाच्या पालकांनी दिलेल्या तक्रारीवरून आरोपी तरुणावर पोक्सो तसेच बळजबरी या कायद्यान्वये गुन्हा दाखल करण्यात आला आहे.
वरोरा शहराच्या मध्यभागी असलेल्या गांधीसागर तलाव परिसरात सायंकाळच्या सुमारास अंधार असल्याचा गैरफायदा घेत आरोपी साहिल संदीप तेलंग (२०, वरोरा) याने एका चारवर्षीय बालकाला चॉकलेटचे आमिष दाखवून तेथे नेले आणि अनैसर्गिक कृत्य केले. पीडित बालकाने घरी परतल्यावर घडलेली घटना पालकांना सांगितली. यानंतर पालकाने तत्काळ वरोरा पोलीस स्टेशन गातून घडलेल्या प्रकरणाची तक्रार केली. पोलिसांनी लगेच तक्रार दाखल करून घेतली व आरोपीविरुद्ध कलम १३७/२ नुसार बळजबरी आणि पोक्सो कायद्याच्या कलम ४ व ६ अंतर्गत गुन्हा नोंदविला.
या प्रकरणाचा तपास पोलीस उपनिरीक्षक मनोज वासाडे करीत आहेत. या घटनेमुळे बालकांच्या सुरक्षिततेचा प्रश्न पुन्हा ऐरणीवर आला आहे, पालकांनी आपल्या चिमुकल्यांवर लक्ष ठेवण्याची आवश्यकता असतानाच अत्याचार होऊ शकेल, अशा संभाव्य ठिकाणी पोलिसांनी लक्ष केंद्रित करण्याची गरज या घटनेमुळे निर्माण झाली आहे.
शहरात संतापाची लाट
ही घटना उघडकीस येताच वरोरा शहरात संतापाची लाट उसळली आहे. स्थानिक नागरिक, सामाजिक कार्यकर्ते आणि बालहक्क संरक्षण समितीच्या पदाधिकाऱ्यांनी या घटनेचा तीव्र निषेध केला आहे. या घटनेतील आरोपीला कठोरात कठोर शिक्षा द्यावी, अशी मागणी केली जात आहे.
