CP Radhakrishnan Takes Oath As Vice President: सीपी राधाकृष्णन यांनी शुक्रवारी सकाळी10 वाजता राष्ट्रपती भवनात उपराष्ट्रपतीपदाची शपथ घेतली. राष्ट्रपती द्रौपदी मुर्मू यांनी त्यांना शपथ दिली. शपथविधी सोहळ्याला पंतप्रधान नरेंद्र मोदी, गृहमंत्री अमित शहा, संरक्षण मंत्री राजनाथ सिंह, भाजप अध्यक्ष जेपी नड्डा यांच्यासह केंद्रीय मंत्रिमंडळ उपस्थित होते.
जगदीप धनखर यांची शपथविधी सोहळ्याला हजेरी
माजी उपराष्ट्रपती जगदीप धनखर यांनीही या शपथविधीला उपस्थित राहून सर्वांचे लक्ष वेधून घेतले. उपराष्ट्रपतीपदाचा राजीनामा दिल्यानंतर त्यांनी पहिल्यांदाच सार्वजनिकरीत्या हजेरी लावली.
विरोधकांची उपस्थिती, राहुल गांधी अनुपस्थित
दरम्यान, यावेळी काँग्रेस अध्यक्ष मल्लिकार्जुन खर्गे यांच्यासह विरोधी पक्ष नेतेही शपथविधीला उपस्थित होते. मात्र, राहुल गांधी गुजरात दौऱ्यावर असल्याने ते अनुपस्थित राहिले.
राज्यपालपदाचा राजीनामा
उपराष्ट्रपती निवडणुकीत 9 सप्टेंबर रोजी विजय मिळवल्यानंतर राधाकृष्णन यांनी गुरुवारी महाराष्ट्राचे राज्यपालपद सोडले. राष्ट्रपतींनी महाराष्ट्राचा अतिरिक्त कार्यभार गुजरातचे राज्यपाल आचार्य देवव्रत यांच्याकडे सोपवला आहे. राधाकृष्णन यांनी विरोधी पक्षाचे उमेदवार बी. सुदर्शन रेड्डी यांचा 152 मतांनी पराभव करून उपराष्ट्रपतीपदाची निवडणूक जिंकली.
