Garib Rath Train Fire: अमृतसरहून सहरसाकडे जाणाऱ्या गरीब रथ एक्सप्रेस ट्रेनला शनिवारी सकाळी आग लागल्याची धक्कादायक घटना घडली. सरहिंद रेल्वे स्थानकापासून अवघ्या अर्ध्या किलोमीटर अंतरावर ही दुर्घटना घडली असून, तीन सामान्य डब्यांचे मोठे नुकसान झाले आहे. आगीत एक महिला प्रवासी जखमी झाली असून तिला उपचारासाठी रुग्णालयात दाखल करण्यात आलं आहे.
घटनेदरम्यान एका डब्यातून अचानक धूर निघू लागल्याचे लक्षात येताच ट्रेन तात्काळ थांबवण्यात आली. अल्पावधीतच आग इतर डब्यांमध्येही पसरली. तत्परतेने कामगिरी करत रेल्वे कर्मचारी आणि स्थानिक प्रशासनाने प्रवाशांना सुरक्षितपणे बाहेर काढले. सुदैवाने या आगीत कोणतीही दुखापत किंवा जीवितहानी झाली नाही.
सरहिंद जीआरपीचे एसएचओ रतन लाल यांनी सांगितले की, डब्यातून धूर येत असल्याचे दिसताच चालकाने ट्रेन थांबवली. प्रवाशांना वेळेत बाहेर काढल्यामुळे मोठी दुर्घटना टळली. आगीत तीन डब्यांचे नुकसान झाले असून, आगीचे कारण शोधण्यासाठी तपास सुरू आहे.
रेल्वे मंत्रालयानेही या घटनेची पुष्टी करत म्हटलं आहे की, आज सकाळी पंजाबमधील सरहिंद स्थानकावर 12204 अमृतसर-सहरसा गरीब रथ एक्सप्रेसच्या एका डब्यात आग लागली. सुदैवाने कोणतीही जीवितहानी झालेली नाही आणि आग पूर्णपणे विझवण्यात आली आहे. दरम्यान, या घटनेनंतर रेल्वे प्रशासनाकडून प्रवाशांना पर्यायी सुविधा पुरवण्यात येत आहेत. मात्र, या घटनेमुळे प्रवाशांमध्ये भीतीचे वातावरण निर्माण झाले असून, रेल्वे सुरक्षेविषयी प्रश्न पुन्हा एकदा उपस्थित झाले आहेत.
