Indapur Murder Case: इंदापूर तालुक्यातील मदनवाडी गावात एक भीषण प्रकार उघडकीस आला आहे. गावातील पुलाखाली पाण्यात गर्भवती महिलेचा कुजलेला मृतदेह सापडल्याने परिसरात खळबळ उडाली आहे. या घटनेमुळे नागरिकांमध्ये भीती आणि संभ्रमाचे वातावरण निर्माण झाले आहे. मृत महिलेचे वय अंदाजे 25 ते 30 वर्षे असून, ती सुमारे सहा ते सात महिन्यांची गर्भवती होती, अशी प्राथमिक माहिती मिळाली आहे. तिची ओळख अद्याप पटलेली नाही. मात्र, तिच्या डाव्या हातावर ‘रविराज’ असा टॅटू आढळल्याने तपासाला महत्त्वाचा धागा मिळाल्याचे पोलिसांनी सांगितले आहे.
घटनास्थळी भिगवण पोलिसांनी तत्काळ धाव घेतली आणि मृतदेह ताब्यात घेऊन पंचनामा केला. मृतदेह अत्यंत कुजलेल्या अवस्थेत सापडल्याने पोलिसांचा अंदाज आहे की, महिलेचा मृत्यू सुमारे पाच ते सहा दिवसांपूर्वी झाला असावा. प्राथमिक तपासात हा खूनाचा प्रकार असू शकतो, असा संशय व्यक्त केला जात आहे. पोलिसांचा विश्वास आहे की महिलेची इतरत्र हत्या करून मृतदेह पुलाखाली फेकण्यात आला असावा.
हेही वाचा – दारूसाठी दोन मुलांनी आईला संपवलं! खलबत्त्याने डोक ठेचून केली निर्घृण हत्या
या प्रकरणाचा गुंता सोडवण्यासाठी पोलिसांनी जवळील सीसीटीव्ही फुटेज, बेपत्ता व्यक्तींच्या तक्रारी आणि मोबाईल लोकेशन डेटा तपासण्यास सुरुवात केली आहे. सध्या महिलेची ओळख पटवणे हेच पोलिसांसमोरचं मोठं आव्हान आहे. भिगवण पोलिसांनी नागरिकांना आवाहन केलं आहे की, या प्रकरणाबाबत काही माहिती असल्यास पुढे येऊन ती पोलिसांना द्यावी. तपास जलदगतीने सुरू असून आरोपींचा शोध घेण्यासाठी सर्व शक्य दिशा तपासल्या जात आहेत.
