पुणे: दिवाळीच्या उत्सवातनंतर पुणे शहराला स्वच्छ ठेवण्यासाठी महानगरपालिका सज्ज झाली आहे. फटाके, फुलबाजार, पूजा साहित्य आणि सणासुदीच्या खरेदीमुळे या काळात शहरात दररोजच्या तुलनेत अधिक कचरा निर्माण झाला. या पार्श्वभूमीवर पुणे महानगरपालिकेने (PMC) विशेष स्वच्छता मोहीम राबवून दिवाळीदरम्यान सरासरी २,६०० मेट्रिक टन कचरा दररोज गोळा केला.
सामान्य दिवसांमध्ये पुण्यात दररोज सुमारे २,४०० मेट्रिक टन कचरा संकलित केला जातो. मात्र दिवाळीत हे प्रमाण जवळपास १५० टनांनी वाढले. ऑनलाइन ऑर्डर्स, पॅकेजिंग बॉक्स, फटाके, तसेच बाजारपेठांमधील तात्पुरत्या स्टॉलमुळे कचऱ्याचे प्रमाण लक्षणीयरीत्या वाढले. शहरातील विविध भागांमध्ये पूजा साहित्य, फुलांचे अवशेष आणि फटाक्यांचा कचरा मोठ्या प्रमाणात दिसून आला.
महानगरपालिकेच्या आकडेवारीनुसार
१३ ऑक्टोबर : २,७३४.२ मेट्रिक टन
१४ ऑक्टोबर : २,७४२.३ मेट्रिक टन
१५ ऑक्टोबर : २,६६६.६९ मेट्रिक टन
१६ ऑक्टोबर : २,५७४.४४ मेट्रिक टन
या चार दिवसांत सरासरी २,६०० मेट्रिक टन कचरा गोळा करण्यात आला. PMC च्या घनकचरा व्यवस्थापन विभागाचे उपायुक्त संदीप कदम म्हणाले, दिवाळीच्या काळात बाजारपेठा आणि निवासी भाग दोन्हीकडे कचऱ्याचे प्रमाण वाढले. या वाढीला तोंड देण्यासाठी प्रत्येक झोनमध्ये विशेष स्वच्छता पथके तैनात करण्यात आली. नियमित २,४०० टनांच्या तुलनेत या काळात दररोज सरासरी २,६०० टन कचरा गोळा करण्यात आला, म्हणजेच सुमारे १५० टनांची वाढ झाली.
शहरातील स्वच्छता राखण्यासाठी PMC ने अतिरिक्त गाड्या, मजूर आणि शिफ्ट्स वाढवून कामकाज सुरळीत ठेवले. नागरिकांनीही स्वच्छतेत सहकार्य करत दिवाळीचे दिवस कचरा मुक्त करण्यास मदत केली, असे अधिकाऱ्यांनी सांगितले.
