Ashok Kharat Case: भोंदूगिरी आणि लैंगिक शोषणाच्या आरोपांनी हादरलेल्या अशोक खरात प्रकरणात आता एका मोठ्या आर्थिक घोटाळ्याचा स्फोट झाला आहे. खरातने फसवणुकीतून कमावलेली कोट्यवधींची ‘माया’ पचवण्यासाठी बँकिंग यंत्रणेचा वापर केल्याचे समोर आले असून, या कटात साथ देणाऱ्या सिन्नरच्या जगदंबा पतसंस्थेचा व्यवस्थापक अविनाश कांडेकर याला पोलिसांनी अटक केली आहे. या कारवाईमुळे या रॅकेटचे धागेदोरे थेट बँकिंग क्षेत्रापर्यंत पोहोचल्याचे स्पष्ट झाले आहे.
बनावट खात्यांचा सुळसुळाट
तपासादरम्यान विशेष तपास पथकाला (SIT) धक्कादायक माहिती मिळाली आहे. खरातने आपले काळे पैसे पांढरे करण्यासाठी सिन्नरमधील जगदंबा पतसंस्थेची निवड केली होती. खरातशी संबंधित तब्बल ३२ संशयास्पद खाती या पतसंस्थेत आढळली आहेत. ही सर्व खाती बनावट कागदपत्रांच्या आधारे उघडण्यात आली होती. या खात्यांमधून गेल्या काही काळात कोट्यवधी रुपयांचे संशयास्पद व्यवहार झाले असून, ही रक्कम फसवणुकीच्या माध्यमातून जमा झाल्याचा पोलिसांना संशय आहे.
मॅनेजर कांडेकर पोलिसांच्या जाळ्यात
पतसंस्थेचे सर्व नियम धाब्यावर बसवून खरातला या बेकायदेशीर व्यवहारांसाठी मदत केल्याचा ठपका व्यवस्थापक अविनाश कांडेकर याच्यावर ठेवण्यात आला आहे. खरातच्या आर्थिक व्यवहारांना कायदेशीर कवच मिळवून देण्यात कांडेकरची भूमिका कळीची ठरली. सिन्नर पोलिसांनी त्याला अटक करून न्यायालयात हजर केले असता, न्यायालयाने त्याला अधिक चौकशीसाठी एक दिवसाची पोलीस कोठडी सुनावली आहे.
SIT चा तपास आता ‘मास्टरमाइंड’च्या शोधात
या ३२ खात्यांमधील पैशांचा हिशोब लागल्यास या प्रकरणातील अनेक बडे मासे गळाला लागण्याची शक्यता आहे. या अटकेमुळे खरातच्या अडचणीत प्रचंड वाढ झाली असून, आगामी काळात या आर्थिक रॅकेटचे आणखी धक्कादायक पदर उलगडले जाण्याची चिन्हे आहेत.
