Katraj Ghat Accident: कात्रज घाटातील धोकादायक वळणावर गुरुवारी सायंकाळी साडेपाचच्या सुमारास काळाने घाला घातला. स्वारगेटहून सांगलीकडे जाणाऱ्या एसटी बसने समोरून येणाऱ्या रिक्षाला जोरदार धडक दिली. हा अपघात इतका भीषण होता की रिक्षाचा अक्षरशः चक्काचूर झाला असून, रिक्षाचालकाचा जागीच मृत्यू झाला आहे.
नेमकी घटना कशी घडली?
आंबेगाव पोलीस ठाण्याच्या हद्दीतील कात्रज घाट बोगदा ओलांडल्यानंतर दुसऱ्या वळणावर हा थरार घडला. एसटी बस (MH 10 DT 2697) स्वारगेटहून सांगली जिल्ह्यातील विटाच्या दिशेने निघाली होती. तसेच रिक्षा (MH 12 GS 9695) खेड शिवापूरकडून पुण्याच्या दिशेने येत होती. वळणाचा अंदाज न आल्याने किंवा वेगावर नियंत्रण सुटल्याने दोन्ही वाहनांची समोरासमोर भीषण धडक झाली.
हानी आणि जखमींचा तपशील
या दुर्घटनेत रिक्षाचालक हनुमंत रमेश हंगरगे (वय ४२, रा. बिबेवाडी) यांचा जागीच प्राण गेला. अपघातावेळी रिक्षात असलेले इतर तीन प्रवासी गंभीर जखमी झाले आहेत.
- राजेश इंगवले (वय ४८, रा. कात्रज)
- दशरथ निरगुडे (वय ४३, रा. बिबेवाडी)
- शहाजी लक्ष्मण शिवदे (वय ४१, रा. बिबेवाडी)
जखमींना तातडीने १०८ रुग्णवाहिकेतून जवळच्या रुग्णालयात हलवण्यात आले असून त्यांच्यावर उपचार सुरू आहेत.
बस चालकावर कारवाई
घटनेची माहिती मिळताच आंबेगाव पोलिसांनी घटनास्थळी धाव घेत बचावकार्य राबवले. एसटी बस चालक जालिंदर विष्णू शिंदे (वय ५३, रा. खानापूर, सांगली) यांना पोलिसांनी ताब्यात घेतले असून त्यांची वैद्यकीय तपासणी केली जात आहे. अपघातामुळे घाटात काही काळ विस्कळीत झालेली वाहतूक पोलिसांनी सुरळीत केली.
सुरक्षेचा प्रश्न पुन्हा ऐरणीवर
कात्रज घाटातील ही वळणे प्रवाशांसाठी मृत्यूचा सापळा ठरत आहेत का? असा प्रश्न या अपघातानंतर उपस्थित होत आहे. वळणावर वाहनांचा वेग आणि दिशा चुकल्यास अशा भीषण दुर्घटना घडत असल्याचे मत स्थानिक नागरिक व्यक्त करत आहेत.
