Pimpri Chinchwad Crime : पिंपरी-चिंचवडमधील भोसरी परिसरातून एक अत्यंत हृदयद्रावक घटना समोर आली आहे. आपल्या पोटच्या मुलीचा आणि पत्नीचा विरह सहन न झाल्याने एका तरुणाने फेसबुक लाईव्ह करत मृत्यूला कवटाळले आहे. केशरी प्रसाद शाहू असे या मृत तरुणाचे नाव असून, भाजी मंडईच्या छतावरील पाण्याच्या टाकीवरून उडी मारून त्याने आपली जीवनयात्रा संपवली. या घटनेने संपूर्ण पुण्यात मोठी खळबळ उडाली आहे.
फेसबुक लाईव्हमध्ये मांडली व्यथा: “मला जगायचं होतं…”
आत्महत्येचे टोकाचे पाऊल उचलण्यापूर्वी केशरी प्रसादने सोशल मीडियावर एक लाईव्ह व्हिडिओ शेअर केला होता. सुमारे एक मिनिट सहा सेकंदांच्या या व्हिडिओमध्ये तो प्रचंड रडताना दिसत आहे. ‘मला माझ्या पत्नीला भेटायचं आहे, मला माझं आयुष्य जगायचं आहे,’ अशा शब्दांत त्याने आपल्या मनातील आर्त हाक दिली. मात्र, काही क्षणातच त्याने मृत्यूचा मार्ग निवडला.
‘आय मिस यू दिव्यांशी’ : चिठ्ठीतील शब्दांनी पाणावले डोळे
पोलिसांना घटनास्थळी प्रसादने लिहिलेली तीन पानांची सुसाईड नोट सापडली आहे. या चिठ्ठीतील प्रत्येक शब्दातून त्याचे आपल्या मुलीवर असलेले अफाट प्रेम व्यक्त होत आहे. मृत्यूनंतर आपल्या चिमुकल्या मुलीनेच आपल्याला मुखाग्नी द्यावा किंवा आपले दफन करावे, अशी भावनिक इच्छाही त्याने पत्रात लिहिली आहे.
नेमकी घटना काय?
गेल्या काही महिन्यांपासून केशरी प्रसादची पत्नी मुलीला घेऊन वेगळी राहत होती. या एकाकीपणामुळे तो मानसिक नैराश्यात होता. काल दुपारी साडेचारच्या सुमारास तो भोसरी भाजी मंडईच्या दुसऱ्या मजल्यावरील टाकीवर चढला. माहिती मिळताच पोलीस आणि अग्निशमन दलाने धाव घेतली. जवानांनी तब्बल पाऊण तास त्याची समजूत काढण्याचा प्रयत्न केला, पण दुर्दैवाने यश आले नाही. बघ्यांच्या अफाट गर्दीसमोर त्याने टाकीवरून थेट खाली उडी घेतली.
