PCMC Mayor Election 2026 : उद्योगनगरी म्हणून ओळखल्या जाणाऱ्या पिंपरी-चिंचवड महानगरपालिकेच्या २७ व्या महापौरपदाची माळ अखेर भाजपचे रवी लांडगे यांच्या गळ्यात पडली आहे. विशेष म्हणजे, महापौर आणि उपमहापौर अशा दोन्ही महत्त्वाच्या पदांच्या निवडी बिनविरोध पार पडल्या असून, भाजपने शहरातील आपले राजकीय वर्चस्व पुन्हा एकदा सिद्ध केले आहे. निवडणूक निर्णय अधिकारी दीपक तावरे यांनी शुक्रवारी या निवडीवर अधिकृत शिक्कामोर्तब केले.
विरोधकांची माघार आणि ‘बिनविरोध’चा मार्ग
या निवडणुकीत सुरुवातीला मोठी चुरस पाहायला मिळेल अशी शक्यता वर्तवण्यात येत होती, मात्र प्रत्यक्ष मतदानाच्या वेळी चित्र पूर्णपणे बदलले. महापौरपदासाठी राष्ट्रवादी काँग्रेसने (अजित पवार गट) कोणताही उमेदवार रिंगणात न उतरवल्याने रवी लांडगे यांची निवड केवळ एक औपचारिकता ठरली. दुसरीकडे, उपमहापौरपदासाठी राष्ट्रवादीच्या वैशाली काळभोर यांनी उमेदवारी अर्ज दाखल केला होता, मात्र त्यांनी ऐनवेळी माघार घेतल्याने भाजपच्या शर्मिला बाबर यांचा विजय सुकर झाला.
उपमहापौर निवडीत भाजपचे नाट्यमय ‘ट्विस्ट’
निवडणूक प्रक्रियेदरम्यान भाजपला अंतर्गत पातळीवर काही नाट्यमय घडामोडींना सामोरे जावे लागले. पक्षाने सुरुवातीला उपमहापौरपदासाठी शीतल उर्फ विजय शिंदे यांच्या नावावर शिक्कामोर्तब केले होते. मात्र, शिंदे यांनी अचानक महापालिकेतून प्रस्थान केल्याने पेच निर्माण झाला. अशा परिस्थितीत भाजपने तातडीने रणनीती बदलून शर्मिला बाबर यांना संधी देण्याचा निर्णय घेतला. कोणताही गोंधळ उडू नये यासाठी अत्यंत गुप्ततेने ही प्रक्रिया पार पाडत भाजपने आपला गड राखला.
हेही वाचा – सुवर्णसंधी ! पुणे महानगरपालिकेत निघाली मेगा भरती; ऑनलाईन करता येणार अर्ज…
रवी लांडगे: लोकप्रियतेचा नवा विक्रम
नवनियुक्त महापौर रवी लांडगे यांच्या निवडीने पिंपरी-चिंचवडच्या राजकारणात एक नवा विक्रम प्रस्थापित झाला आहे. सलग दोन वेळा ‘बिनविरोध’ नगरसेवक म्हणून निवडून येण्याचा मान मिळवल्यानंतर, आता महापौरपदीही त्यांची निवड बिनविरोध झाली आहे. १२८ पैकी ६५ पेक्षा जास्त जागा जिंकून सत्ता राखणाऱ्या भाजपच्या या कार्यकाळातील ते पहिले महापौर ठरले आहेत. त्यांच्या या ‘हॅट्ट्रिक’मुळे राजकीय वर्तुळात त्यांच्या लोकप्रियतेची चर्चा रंगली आहे.
