Pune Crime: पुणे शहराची जीवनवाहिनी समजल्या जाणाऱ्या पीएमपी बसमध्येच सुरक्षिततेचा प्रश्न पुन्हा एकदा ऐरणीवर आला आहे. कात्रज ते स्वारगेट या मार्गावर धावणाऱ्या बसमध्ये एका नराधम कंडक्टरने अल्पवयीन मुलीशी अश्लील चाळे केल्याचा घृणास्पद प्रकार उघडकीस आला आहे. या घटनेमुळे प्रवाशांमध्ये प्रचंड संतापाची लाट उसळली असून पोलिसांनी आरोपीला बेड्या ठोकल्या आहेत.
बसमधील तो थरार…
मिळालेल्या माहितीनुसार, संबंधित अल्पवयीन मुलगी बसमधून प्रवास करत असताना कंडक्टरने तिच्याशी लगट करण्याचा प्रयत्न केला. आरोपीने आधी तिला मोबाईल नंबर मागून त्रास दिला आणि त्यानंतर संधी साधून तिला अयोग्य स्पर्श करत तिचा विनयभंग केला. घाबरलेल्या मुलीने प्रसंगावधान राखून आरडाओरडा केल्यावर बसमधील प्रवासी धावून आले. प्रवाशांनी या विकृत कंडक्टरला पकडून चांगलेच धारेवर धरले आणि थेट सहकारनगर पोलिसांच्या स्वाधीन केले. पीडितेच्या आईच्या तक्रारीवरून पोलिसांनी आरोपीवर पोक्सो (POCSO) अंतर्गत गुन्हा दाखल केला आहे.
६६ वर्षीय वृद्धाचे १० वर्षांच्या चिमुरडीसोबत गैरवर्तन
पुण्यातील दुसरी संतापजनक घटना सिंहगड रस्ता परिसरात घडली आहे. येथे एका १० वर्षांच्या निष्पाप मुलीचा विनयभंग केल्याप्रकरणी ६६ वर्षीय व्यक्तीवर गुन्हा दाखल करण्यात आला आहे. नराधम वृद्धाने केलेल्या या कृत्यामुळे परिसरात खळबळ उडाली आहे. मुलीने धाडसाने हा सर्व प्रकार आपल्या आईला सांगितल्यानंतर हे प्रकरण उजेडात आले. सिंहगड रस्ता पोलिसांनी याप्रकरणी तातडीने गुन्हा नोंदवून पुढील तपास सुरू केला आहे.
प्रशासनाविरुद्ध नागरिकांचा रोष
एका बाजूला सार्वजनिक बसमधील कर्मचारीच सुरक्षिततेऐवजी भीतीचे कारण बनत आहेत, तर दुसरीकडे परिसरात ज्येष्ठ नागरिकांकडून अशा घटना घडत असल्याने पुणेकर चिंता व्यक्त करत आहेत. “प्रशासनाने बसमध्ये महिलांच्या सुरक्षेसाठी सीसीटीव्ही आणि मार्शल तैनात करावेत,” अशी मागणी आता जोर धरू लागली आहे.
