Nagpur Crime: नागपूर जिल्ह्यातील सावनेर तालुक्यात एक अत्यंत मन हेलावून टाकणारी घटना उघड झाली आहे. स्थानिक महिला कबड्डीपटूने सततच्या त्रासाला कंटाळून आयुष्य संपवल्याची माहिती समोर आली असून, या प्रकरणामुळे माळेगाव टाऊन परिसरात मोठी खळबळ माजली आहे. किरण सूरज दाढे असे मृत महिला कबड्डीपटूचे नाव असून ती गेल्या काही वर्षांपासून खेळात सक्रिय होती.
नोकरीचं आमिष
प्राप्त माहितीनुसार, किरणचे २०२० मध्ये स्वप्निल जयदेव लांबघरे या व्यक्तीसोबत नोंदणी विवाह झाला होता. लग्नापूर्वी स्वप्निलने तिला वेकोलीमध्ये नोकरी मिळवून देण्याचे आश्वासन दिले होते. आर्थिक परिस्थितीत सुधारणा होईल या विश्वासाने किरणने विवाहस्वरूप नाते स्वीकारले होते. मात्र, लग्नानंतर परिस्थिती पूर्णपणे उलट झाली. स्वप्निलने किरणला स्वतःकडे न ठेवता तिला माहेरीच राहण्यास भाग पाडले. दरम्यान, नोकरीच्या आश्वासनाबाबत सतत टाळाटाळ, वारंवार मानसिक त्रास, तसेच शरीरसंबंधांसाठी कथित दबाव अशा अनेक प्रकारच्या छळाला किरणला सामोरे जावे लागत असल्याचे आरोप नातेवाईकांनी केले आहेत. त्याचदरम्यान स्वप्निलने घटस्फोटाची याचिका दाखल केल्याचेही उघड झाले.
हेही वाचा –सोलापूर हादरले..! सासरच्या त्रासाला कंटाळून विवाहितेची आत्महत्या, चार जणांवर गुन्हा दाखल
4 डिसेंबरला घेतला टोकाचा निर्णय
या सततच्या त्रासाला कंटाळलेल्या किरणने ४ डिसेंबरच्या सकाळी कीटकनाशक प्राशन केले. त्यानंतर तिला तातडीने नागपूर मेडिकल कॉलेजमध्ये दाखल करण्यात आले. परंतु, 7 डिसेंबरला उपचारादरम्यान तिचा मृत्यू झाला.
आरोपी पती फरार
किरणच्या मृत्यूमागील छळाच्या तक्रारीवरून सावनेर पोलिसांनी आरोपी स्वप्निल लांबघरेविरोधात गुन्हा नोंदवला आहे. मात्र, प्रकरण उघड होताच तो फरार झाल्याचे समोर आले असून त्याचा शोध घेण्यासाठी पोलिसांनी तपासाची गती वाढवली आहे. एका होतकरू महिला खेळाडूच्या आयुष्याशी अशा प्रकारे खेळ केल्याच्या आरोपांनी सावनेर परिसरात संतापाची लाट पसरली असून, घटनेची सखोल चौकशी करण्याची मागणी होत आहे.
