नवी दिल्ली : सध्या इराणवर अमेरिका आणि इस्त्रायल या देशांकडून हल्ले केले जात आहेत. त्यातच अमेरिकेचे राष्ट्राध्यक्ष डोनाल्ड ट्रम्प यांनी सोमवारी घोषणा केली की ते इराणच्या ऊर्जा केंद्रांवरील हल्ले पाच दिवसांसाठी पुढे ढकलतील. यापूर्वी, त्यांनी होर्मुझच्या सामुद्रधुनीवर इराणला ४८ तासांचा अल्टिमेटम दिला होता. ट्रम्प यांच्या भूमिकेतील या बदलाचा केवळ अमेरिकन आणि आशियाई बाजारांवरच थेट परिणाम झाला नाही, तर कच्च्या तेलाच्या किमतींमधील तेजीही शमली.
इराणवर ५ दिवस हल्ला नाही या घोषणेनंतर, कच्च्या तेलाच्या किमतीत १० टक्क्यांहून अधिक अचानक घसरण झाली, ज्यामुळे जगाला दिलासा मिळाला. मात्र, मंगळवारपर्यंत, ट्रम्प यांच्या घोषणेवर इराणने दिलेल्या प्रतिक्रियेनंतर कच्च्या तेलाच्या किमती पुन्हा बदलू लागल्याचे दिसून आले. डोनाल्ड ट्रम्प हे गेल्या रविवारपर्यंत इराणबाबत कठोर भूमिका घेत होते. त्यांनी इराणला होर्मुझची सामुद्रधुनी पुन्हा उघडण्यासाठी ४८ तासांचा अल्टिमेटम दिला होता. जर इराणने कोणत्याही धमक्यांशिवाय ही सामुद्रधुनी पुन्हा उघडली नाही, तर अमेरिका इराणच्या ऊर्जा केंद्रांवर हल्ला करेल.
डोनाल्ड ट्रम्प यांनी आता इराणच्या ऊर्जा प्रकल्पांवरील हल्ला पाच दिवसांसाठी पुढे ढकलला आहे. यामागील कारण स्पष्ट करताना त्यांनी सांगितले की, मध्य-पूर्वेतील समस्येवर तोडगा काढण्याबाबत दोन्ही देशांमध्ये चांगली आणि अर्थपूर्ण चर्चा झाली आहे.
कच्च्या तेलाच्या किमतींवर परिणाम
ट्रम्प यांच्या घोषणेनंतर, अमेरिकन शेअर बाजारात मोठी तेजी दिसून आली, निफ्टी ९०० अंकांनी वाढला. दरम्यान, याचा सर्वात मोठा परिणाम कच्च्या तेलाच्या किमतींवर झाला, ज्या आंतरराष्ट्रीय बाजारात रातोरात १०% पेक्षा जास्त घसरून प्रति बॅरल १०० डॉलरच्या खाली आल्या.
