मुंबई : गेला आठवडा शेअर बाजारातील गुंतवणूकदारांसाठी म्हणावा तसा फायद्याचा ठरला नाही. कधी सेन्सेक्स आणि निफ्टीने लक्षणीय वाढ केली, तर कधी अचानक घसरण झाली. सेन्सेक्सवरील टॉप १० सर्वात मौल्यवान कंपन्यांपैकी पाच कंपन्यांचे बाजारमूल्य वाढले, तर पाच कंपन्यांना लक्षणीय तोटा सहन करावा लागला.
गेल्या काही आठवड्यांपासून सातत्याने कमाईच्या चार्टमध्ये आघाडीवर असलेल्या मुकेश अंबानीच्या रिलायन्स इंडस्ट्रीजला यावेळी सर्वात मोठा तोटा सहन करावा लागला. टाटा ग्रुपच्या टीसीएसमध्ये गुंतवणूक करणाऱ्या गुंतवणूकदारांनी फक्त पाच व्यापारी दिवसांत जवळपास ३६००० कोटी रुपये कमावले. मुंबई शेअर बाजाराच्या ३० शेअर्सच्या सेन्सेक्स निर्देशांकात गेल्या आठवड्यात थोडीशी वाढ झाली, तर राष्ट्रीय शेअर बाजाराच्या निफ्टीत घट झाली.
दरम्यान, सेन्सेक्सच्या टॉप १० कंपन्यांपैकी पाच कंपन्यांचे बाजारमूल्य एकत्रित ७२२८४.७४ कोटींनी वाढले. सर्वाधिक उत्पन्न देणाऱ्या कंपन्यांमध्ये टाटा समूहाच्या टीसीएससह आयसीआयसीआय बँक, इन्फोसिस, बजाज फायनान्स आणि भारती एअरटेल यांचा समावेश होता. रिलायन्स, एचडीएफसी बँक, स्टेट बँक, एलआयसी आणि एलटीसारख्या कंपन्यांचे मार्केट कॅप घसरले.
रिलायन्स बुडाले, टीसीएस वाढले
शेअर बाजारातील अस्थिरतेदरम्यान, देशातील सर्वात श्रीमंत व्यक्ती मुकेश अंबानी यांच्या मालकीच्या रिलायन्स इंडस्ट्रीजचे मार्केट कॅप पाच ट्रेडिंग दिवसांत २०८५२१८.७१ कोटींवर घसरले, ज्यामुळे गुंतवणूकदारांवर थेट ३५११६.७६ कोटींचा परिणाम झाला. टाटा समूहाच्या आयटी कंपनी टीसीएसचे मार्केट कॅप आणखी वाढून ११७१८६२.३७ कोटींवर पोहोचले.
