Pune Dengue Update: पुणे शहर आणि परिसरात डेंग्यूचा प्रादुर्भाव वेगाने वाढत असल्याचे धक्कादायक वास्तव समोर आले आहे. पुणे महानगरपालिकेच्या आरोग्य विभागाने प्रसिद्ध केलेल्या ताज्या आकडेवारीनुसार, गेल्या वर्षभरात (जानेवारी २०२५ ते जानेवारी २०२६) शहरात डेंग्यूचे तब्बल २,६४५ संशयित रुग्ण आढळले आहेत. या वाढत्या रुग्णसंख्येमुळे महापालिका प्रशासन ‘हायअलर्ट’वर आले असून शहरात प्रतिबंधात्मक मोहिमांना वेग देण्यात आला आहे.
पावसाळ्यात डेंग्यूचा सर्वाधिक कहर
महापालिकेच्या कीटक नियंत्रण विभागाच्या अहवालानुसार, जुलै आणि ऑगस्ट महिन्यांत डेंग्यूचा प्रसार शिगेला पोहोचला होता. एकट्या ऑगस्ट महिन्यात सर्वाधिक ७६५ संशयित रुग्ण नोंदवले गेले. वर्षभरात १०९ रुग्णांचे डेंग्यू रिपोर्ट ‘पॉझिटिव्ह’ आले असून २२ जणांना चिकुनगुनियाची लागण झाली आहे. दिलासादायक बाब म्हणजे, या कालावधीत डेंग्यूमुळे एकाही मृत्यूची नोंद झालेली नाही.
हलगर्जीपणा करणाऱ्यांना ६ लाखांचा दंड
डासांची पैदास रोखण्यासाठी महापालिकेने कंबर कसली असून, नियम धाब्यावर बसवणाऱ्यांविरुद्ध धडक मोहीम हाती घेतली आहे. बांधकाम साईट्स आणि सोसायट्यांना ३,०२९ नोटिसा बजावण्यात आल्या. साचलेल्या पाण्याकडे दुर्लक्ष करणाऱ्यांकडून पालिकेने ६ लाख १९ हजार रुपयांचा दंड वसूल केला आहे.
‘नॅशनल डेंग्यू डे’ निमित्त जनजागृती
आज (१६ मे) ‘राष्ट्रीय डेंग्यू दिन’ साजरा होत असून, यंदाची संकल्पना ‘एक व्हा. कृती करा. निर्मूलन करा’ अशी आहे. डेंग्यूशी लढण्यासाठी केवळ प्रशासनावर विसंबून न राहता नागरिकांचा सहभाग अनिवार्य असल्याचे आरोग्य विभागाने स्पष्ट केले आहे. ताप, अंगदुखी किंवा मळमळ जाणवल्यास घरगुती उपचार न करता त्वरित डॉक्टरांचा सल्ला घेण्याचे आवाहन करण्यात आले आहे.
प्रतिबंधात्मक उपाययोजना:
- आठवड्यातून एक दिवस कोरडा दिवस (Dry Day) पाळून पाण्याची भांडी स्वच्छ करा.
- कुलर, कुंड्या आणि गच्चीवर पाणी साचू देऊ नका.
- बाहेर जाताना पूर्ण कपडे वापरा आणि डास प्रतिबंधक क्रीमचा वापर करा.
- पाण्याच्या टाक्या घट्ट झाकून ठेवा.
