रोहा : मुंबई-गोवा महामार्गावर शनिवारी मध्यरात्री कोलाडनजीक धावत्या लक्झरी बसने अचानक पेट घेतला. या दुर्घटनेमध्ये प्रवासी सुदैवाने बचावले असून कोणतीही जीवितहानी झाली नाही. परंतु बस पूर्णतः जळून खाक झाली. कोलाडनजीक कोकण रेल्वे पुलाखाली ही भयावह घटना घडली. सुदैवाने कोणतीही रेल्वे गाडी न धावल्याने मोठा अनर्थ टळला. या घटनेमुळे दोन्ही बाजूकडील वाहतूक काही काळ थांबवण्यात आली होती.
मुंबई-गोवा राष्ट्रीय महामार्ग क्रमांक ६६ वर रात्री बाराच्या सुमारास ही खासगी बस मुंबई बोरिवलीहून महाड मालवणच्या दिशेने जात असताना कोलाडनजीक कोकण रेल्वे पुलाजवळ अचानकपणे गाडीच्या मागच्या बाजूला जोरदार आवाज आला. बसचालकाने ताबडतोब बस थांबवली. चालकासह बसमधील साथीदारांनी तत्काळ उतरून मागे जाऊन तपासले असता गाडीमध्ये आग लागल्याचे निदर्शनास आले. गाडीमध्ये एकूण प्रवास करणाऱ्या तीस प्रवाशांना तातडीने खाली उतरवण्यात आले.
जवळच असलेले पोलीस प्रशासन तसेच चंद्रकांत लोखंडे, विनायक लोखंडे, दादा धुमाळ, वनविभागाचे अधिकारी, शिक्षक गर्जे, आशिष वाणी व असंख्य सतर्क नागरिक यांच्या मदतीने सह्याद्री वन्यजीव रक्षणार्थ सामाजिक संस्थेला संपर्क साधला. माहिती मिळताच एसव्हीआरएसएस पथक धाटाव, औद्योगिक अग्निशमन दल तसेच दीपक नायट्रेट फायर टीम घटनास्थळी दाखल झाली व लागलेल्या आगीवर नियंत्रण आणण्यात आले. यामध्ये कोणतीही जीवितहानी झाली नाही, परंतु गाडीचे फार मोठे नुकसान झाले. या घटनेबाबत कोलाड पोलीस अधिकारी अधिक तपास करत आहेत.
