Jitendra Shelke Accident: ‘मृत्यूचा महामार्ग’ अशी ओळख होऊ लागलेल्या समृद्धी महामार्गावर रक्ताचा सडा पडणे अद्यापही थांबलेले नाही. शिर्डीकडे जात असताना धोत्रे गावाजवळ झालेल्या एका अंगावर काटा आणणाऱ्या अपघातात अशोक खरात यांचे अत्यंत जवळचे मानले जाणारे जितेंद्र शेळके यांना आपला जीव गमवावा लागला आहे. उभ्या असलेल्या कंटेनरला कारने पाठीमागून दिलेल्या भीषण धडकेमुळे ही दुर्घटना घडली.
कारचा चक्काचूर, शेळकेंचा जागीच मृत्यू
मिळालेल्या माहितीनुसार, जितेंद्र शेळके हे आपल्या पत्नी आणि मुलासह संभाजीनगरहून शिर्डीच्या दिशेने निघाले होते. प्रवासादरम्यान धोत्रे गावाच्या शिवारात रस्त्याच्या बाजूला उभ्या असलेल्या एका अवजड कंटेनरचा अंदाज चालकाला आला नाही. वेग जास्त असल्याने कार थेट कंटेनरच्या मागील भागात जाऊन आदळली. हा आघात इतका जबरदस्त होता की कारचा लोखंडी ढिगारा झाला आणि त्यात शेळके यांचा घटनास्थळीच मृत्यू झाला.
पत्नी आणि मुलाचा श्वास टांगणीला
या काळजाचा थरकाप उडवणाऱ्या घटनेत शेळके यांचा मुलगा आणि पत्नी गंभीर रित्या जखमी झाले आहेत. अपघातानंतर परिसरात एकच खळबळ उडाली. जखमी मुलाला तातडीने रुग्णालयात हलवण्यात आले असले तरी, शेळके यांची पत्नी बराच वेळ कारच्या ढिगाऱ्यात अडकून पडली होती. स्थानिक प्रशासन आणि पोलीस पथकाने क्रेनच्या मदतीने कारचे पत्रे कापून त्यांना बाहेर काढले. सध्या दोघांचीही झुंज मृत्यूशी सुरू असून त्यांची प्रकृती चिंताजनक असल्याचे समजते.
तणावाचे सावट अन् घातपाताची चर्चा?
जितेंद्र शेळके हे केवळ ‘शिवनिका ट्रस्ट’चे उपाध्यक्ष नव्हते, तर ते लैंगिक शोषण आणि फसवणुकीच्या आरोपाखाली अटकेत असलेल्या अशोक खरात यांचे सर्वात विश्वासू साथीदार होते. खरात यांना अटक झाल्यापासून शेळके प्रचंड मानसिक दडपणाखाली होते, अशी चर्चा पोलीस वर्तुळात रंगली आहे. खरात यांच्या व्यवसायातील भागीदारी आणि इतर कायदेशीर गुंतागुंतीमुळे ते अस्वस्थ होते. याच मानसिक संघर्षात असताना त्यांच्या आयुष्याचा असा करुण अंत झाला आहे.
