Baramati News: कऱ्हा नदी पात्रात एका अनोळखी पुरुषाचा मृतदेह आढळून आहे. गुरुवारी सकाळी काही ग्रामस्थ नदीकाठी मासे पकडण्यासाठी गेले होते. यावेळी काही नागरिकांना कऱ्हा नदी पात्रात एका पुरुषाचा मृतदेह पाण्यावर तरंगत असल्याचे आढळून आले. यावेळी ग्रामस्थांनी गावाचे पोलीस पाटील नवनाथ मदने यांना तात्काळ माहिती दिली. त्यानंतर पोलीस पाटीलांनी सदरची माहिती बारामती शहर पोलिसांना कळवली. या घटनेने परिसरात खळबळ उडाली आहे.
मिळालेल्या माहितीनुसार, सकाळी दिसून आलेला मृतदेह तब्बल सहा तास उलटल्यानंतर ही त्याच जागेवर बेवारसपणे पडून होता. पोलीस शिपाई नेवसे यांनी डोर्लेवाडी प्राथमिक आरोग्य केंद्र, ग्रामपंचायत डोर्लेवाडी, बारामती नगरपालिका, या सर्वांना मदतीसाठी फोन केले. मात्र, वेगवेगळे कारण सांगून त्याकडे दुर्लक्ष केले गेले. या भोंगळ कारभारामुळे गावातील तरुणांनी शेवटी एकत्र येत पाण्यामध्ये उतरून तो मृतदेह बाहेर काढला.
मृतदेह हा सडलेला असल्याने त्याच्या दुर्गंधी सर्वत्र पसरली होती. तरीही तरुणांनी ते प्रेत बाहेर काढून पोलीस शिपाई यांच्या ताब्यात देत पुढील कारवाही साठी पंचनामा करून शवविच्छेदनासाठी ग्रामीण रुग्णालयात हलविण्यात आला. मृतदेह दोन ते तीन दिवसांपूर्वीचा असल्याचा प्राथमिक अंदाज व्यक्त करण्यात येत आहे. मृत्यूचे नेमके कारण मात्र अद्याप स्पष्ट झालेले नाही.
