सातारा : सातारा शहरात एका दारुड्या रिक्षाचालकाने महिला पोलीस कॉन्स्टेबलला तब्बल 100 ते 200 मीटर फरफटत नेल्याची थरारक घटना घडली आहे. ही धक्कादायक घटना खंडोबा माळपासून मार्केट यार्डपर्यंतच्या रस्त्यावर घडली असून, ती सीसीटीव्ही कॅमेऱ्यात कैद झाली आहे. या घटनेत महिला कॉन्स्टेबल गंभीर जखमी होऊन रक्तबंबाळ झाली असून, तिच्यावर सध्या रुग्णालयात उपचार सुरू आहेत. या प्रकरणाने सातारा शहरात खळबळ उडाली आहे.
नेमकं काय घडलं?
सातारा शहरातील मध्यवर्ती ठिकाणी दारूच्या नशेत रिक्षा चालवणाऱ्या चालकाला महिला कॉन्स्टेबलने थांबवण्याचा प्रयत्न केला. मात्र, चालकाने कॉन्स्टेबलच्या सूचनांकडे दुर्लक्ष करत तिला थेट फरफटत नेले. या थरारक घटनेत रिक्षाचालकाने 100 ते 200 मीटर अंतरापर्यंत कॉन्स्टेबलला फरफटत नेले, ज्यामुळे ती गंभीर जखमी झाली. याचवेळी रिक्षाचालकाने तीन ते चार वाहनांना धडक दिल्याने परिसरात गोंधळ निर्माण झाला.
नागरिकांनी दिला चोप, पोलिसांनी केली अटक
महिला कॉन्स्टेबलला फरफटत नेत असताना काही सजग नागरिकांनी रिक्षाचालकाला अडवण्याचा प्रयत्न केला. संतप्त जमावाने रिक्षाचालकाला पकडून त्याला चांगलाच चोप दिला. घटनेची माहिती मिळताच सातारा पोलिसांनी तातडीने घटनास्थळी धाव घेतली आणि आरोपी रिक्षाचालकाला ताब्यात घेतले. त्याच्याविरुद्ध गुन्हा नोंदवण्यात आला आहे.
जखमी कॉन्स्टेबलवर उपचार सुरू
या घटनेत गंभीर जखमी झालेल्या महिला कॉन्स्टेबलला तातडीने रुग्णालयात दाखल करण्यात आले आहे. सध्या तिची प्रकृती स्थिर असल्याची माहिती पोलिसांनी दिली आहे. तिच्यावर उपचार सुरू असून, पोलिसांनी या प्रकरणाचा तपास सुरू केला आहे.
