Pune News: पुण्यातील अत्यंत गजबजलेल्या स्वारगेट एसटी स्थानकात प्रवाशांच्या आरोग्याशी खेळ सुरू असल्याचा एक धक्कादायक प्रकार समोर आला आहे. अन्न व औषध प्रशासनाच्या (FDA) पथकाने शनिवारी येथील एका नामांकित स्नॅक्स सेंटरवर अचानक धाड टाकली. या तपासणी दरम्यान हॉटेलच्या किचनमध्ये अत्यंत किळसवाणे आणि आरोग्याला घातक ठरेल असे वातावरण आढळून आले. परिस्थितीचे गांभीर्य ओळखून अधिकाऱ्यांनी कोणतीही दिरंगाई न करता हे कॅन्टीन तत्काळ प्रभावाने कुलूप लावून बंद करण्याचे आदेश दिले आहेत. या कारवाईमुळे स्थानक परिसरात एकच खळबळ उडाली आहे.
स्वयंपाकघरात घाणीचे साम्राज्य; खाद्यपदार्थ उघड्यावर
‘एफडीए’च्या पथकाने जेव्हा या कॅन्टीनच्या अंतर्गत भागाची पाहणी केली, तेव्हा तेथील विदारक चित्र पाहून अधिकारीही अवाक झाले. ग्राहकांसाठी खाद्यपदार्थ तयार केले जाणाऱ्या किचनमधील फरश्या जागोजागी तुटलेल्या होत्या आणि त्यावर मळाचे थर साचले होते. सर्वात धक्कादायक बाब म्हणजे, प्रवाशांच्या पोटात जाणारे अन्नपदार्थ कोणत्याही संरक्षणाशिवाय थेट उघड्यावर, अत्यंत अस्वच्छ वातावरणात साठवून ठेवण्यात आले होते. अन्न साठवण्याच्या या चुकीच्या आणि निष्काळजी पद्धतीमुळे प्रवाशांच्या जीवाला थेट धोका निर्माण झाला होता.
त्रुटींची दुरुस्ती होईपर्यंत व्यवसायाला पूर्णबंदी
हॉटेल चालकाचा हा निष्काळजीपणा समोर आल्यानंतर प्रशासनाने जागेवरच कडक पावले उचलली. जोपर्यंत संपूर्ण किचनची कायापालट केली जात नाही, तुटलेल्या फरश्यांची दुरुस्ती करून साठवणूक व्यवस्थेत सुधारणा होत नाही आणि संपूर्ण परिसर निर्जंतुक केला जात नाही, तोपर्यंत हे खाद्यकेंद्र सुरू करता येणार नाही, असे लेखी आदेश मालकाला बजावण्यात आले आहेत. नियमांचे काटेकोर पालन झाल्याची खात्री पटल्यानंतरच हे कॅन्टीन पुन्हा सुरू होऊ शकेल, असे प्रशासनाने स्पष्ट केले आहे.
नियम न पाळणाऱ्या इतर हॉटेल्सना ‘एफडीए’चा कडक इशारा
स्वारगेटमधील या मोठ्या कारवाईनंतर अन्न व औषध प्रशासनाने शहरातील इतर खाद्यपदार्थ विक्रेते आणि हॉटेल व्यावसायिकांचेही कान टोचले आहेत. पैशांच्या हव्यासापोटी नागरिकांच्या आरोग्याशी तडजोड करणाऱ्यांची गय केली जाणार नाही, असा सज्जड दम प्रशासनाने दिला आहे. आगामी काळात अशाच प्रकारे इतरही हॉटेल्सची अचानक तपासणी केली जाणार असून, दोषी आढळणाऱ्यांवर फौजदारी आणि दंडात्मक कारवाई करण्याचे संकेत देण्यात आले आहेत. दरम्यान, प्रवाशांनीही प्रवासादरम्यान बाहेरचे अन्न खाताना सतर्क राहावे, असे आवाहन करण्यात आले आहे.
