इंदापूर: राज्यातील साखर उद्योगासमोर उभ्या राहिलेल्या गंभीर आर्थिक आणि प्रशासकीय अडचणींच्या पार्श्वभूमीवर मुख्यमंत्री देवेंद्र फडणवीस यांनी सोमवारी, 23 मार्च रोजी मुंबईत एक विशेष बैठक बोलावली आहे. या बैठकीत ऊस उत्पादक शेतकरी, साखर कारखाने, कामगार आणि ऊस तोडणी मजुरांच्या प्रलंबित प्रश्नांवर सविस्तर चर्चा होणार आहे. राष्ट्रीय सहकारी साखर कारखाना महासंघाचे अध्यक्ष हर्षवर्धन पाटील यांनी या बैठकीतून सकारात्मक तोडगा निघेल, अशी आशा व्यक्त केली आहे. महाराष्ट्राची ग्रामीण अर्थव्यवस्था पूर्णपणे साखर उद्योगावर अवलंबून असल्याने या बैठकीकडे संपूर्ण राज्याचे लक्ष लागले आहे.
ग्रामीण अर्थव्यवस्थेचा कणा धोक्यात; ५० लाख शेतकऱ्यांवर परिणाम
हर्षवर्धन पाटील यांच्या मते, साखर उद्योग हा केवळ व्यवसाय नसून तो ग्रामीण विकासाचा मुख्य आधार आहे. सध्या या उद्योगाची वार्षिक उलाढाल सुमारे 60,000 कोटी रुपयांची असून, त्यावर राज्यातील 50 लाख ऊस उत्पादक शेतकरी, 1.5 लाख साखर कामगार आणि 10 लाखांहून अधिक ऊस तोडणी मजूर थेट अवलंबून आहेत. मात्र, बदलत्या आर्थिक परिस्थितीमुळे या क्षेत्रासमोर आव्हाने वाढली असून, तातडीने उपाययोजना न केल्यास आगामी 2026-27 च्या गळीत हंगामात राज्यातील निम्मे साखर कारखाने बंद पडण्याची भीती व्यक्त केली जात आहे.
१० हजार कोटींची देणी प्रलंबित; साखर कारखान्यांची आर्थिक ओढाताण
साखर उद्योगातील आर्थिक तरलतेच्या अभावामुळे सध्या 10,000 कोटी रुपयांहून अधिक देणी प्रलंबित आहेत. यामध्ये शेतकऱ्यांची एफआरपी (FRP), कामगारांचे पगार आणि वाहतूक मजुरीचा समावेश आहे. याशिवाय, बँकांचे सुमारे 15,000 कोटी रुपयांचे कर्जही कारखान्यांवर थकीत आहे. या आर्थिक कोंडीतून बाहेर पडण्यासाठी कर्जांचे पुनर्गठन करणे आणि पुढील हंगामासाठी खेळते भांडवल उपलब्ध करून देणे, हे मुख्यमंत्र्यांसमोरील प्रमुख विषय असणार आहेत.
केंद्र सरकारकडे साखरेचा ‘एमएसपी’ वाढवण्याची मागणी
या बैठकीत केवळ राज्यस्तरीय नव्हे, तर केंद्र सरकारशी संबंधित मुद्द्यांवरही चर्चा होणार आहे. साखरेचा किमान आधारभूत दर (MSP) वाढवणे आणि इथेनॉलचा कोटा व दर वाढवणे या प्रमुख मागण्यांसाठी पंतप्रधान नरेंद्र मोदी आणि केंद्रीय गृहमंत्री अमित शाह यांची भेट घेण्याबाबतही चर्चा होईल. यासोबतच सहवीजनिर्मिती अनुदान आणि पाणीपट्टी दरवाढ यांसारख्या विषयांवरही राज्य सरकारकडून ठोस निर्णयाची अपेक्षा साखर कारखानदारांनी व्यक्त केली आहे.
