Pune Crime: आपल्या अंगावरील किलोभर सोन्यामुळे ‘गोल्डन मॅन’ म्हणून प्रसिद्ध असलेले राष्ट्रवादी काँग्रेसचे (अजित पवार गट) नेते सनी नाना वाघचौरे यांना कुख्यात लॉरेन्स बिश्नोई गँगने लक्ष्य केले आहे. “तुझा बाबा सिद्दिकी करू, गुगलवर सर्च कर आमची दहशत काय आहे,” अशा शब्दांत ५ कोटी रुपयांच्या खंडणीसाठी त्यांना जीवे मारण्याची धमकी देण्यात आली आहे. या प्रकारामुळे खळबळ उडाली असून वाघचौरे यांनी पिंपरी-चिंचवड पोलीस आयुक्तालयात धाव घेत संरक्षणाची मागणी केली आहे.
नेमकं प्रकरण काय?
२५ जानेवारीच्या संध्याकाळी सनी वाघचौरे यांना एका आंतरराष्ट्रीय क्रमांकावरून व्हॉट्सॲप कॉल आला. सुरुवातीला त्यांनी तो उचलला नाही, मात्र पाठोपाठ “शुभम लोणकर कॉल मी” असा मेसेज आला. त्यानंतर झालेल्या संभाषणात समोरून बोलणाऱ्या व्यक्तीने स्वतःची ओळख बिश्नोई गँगचा सदस्य शुभम लोणकर अशी करून दिली. “गुगलवर सर्च कर आमची गँग कोण आहे, बाकी मेसेजवर बोलू,” असे सांगून त्याने फोन कट केला.
बाबा सिद्दिकींचा उल्लेख करत धमकी
सुरुवातीला सनी वाघचौरे यांनी याकडे थट्टा म्हणून दुर्लक्ष केले, मात्र २६ जानेवारीला आलेल्या मेसेजने त्यांची झोप उडवली. खंडणीची रक्कम देण्यासाठी केवळ ५ दिवसांचा वेळ देण्यात आला आहे. जर पैसे दिले नाहीत, तर माजी राज्यमंत्री बाबा सिद्दिकी यांच्यासारखीच तुमची अवस्था करू, अशी थेट धमकी या मेसेजमध्ये देण्यात आली आहे.
कोण आहेत सनी वाघचौरे?
अंगावर नेहमी २ ते ३ किलो सोन्याचे दागिने घालण्यासाठी ते संपूर्ण देशात प्रसिद्ध आहेत. ६ जानेवारी रोजी त्यांनी उपमुख्यमंत्री अजित पवार यांच्या उपस्थितीत राष्ट्रवादी काँग्रेसमध्ये प्रवेश केला होता. इंस्टाग्रामवर त्यांचे तब्बल २५ मिलियन (२.५ कोटी) फॉलोअर्स आहेत.
पोलीस कारवाई आणि तपास
धमकीच्या गंभीर स्वरूपामुळे सनी वाघचौरे यांनी पोलीस आयुक्तालयात लेखी तक्रार दाखल केली आहे. बिश्नोई गँगच्या नावाचा वापर करून कोणी खंडणी उकळत आहे की खरंच गँगने हे कृत्य केले आहे, याचा तपास पिंपरी-चिंचवड पोलीस करत आहेत. दरम्यान, त्यांनी स्वतःच्या आणि कुटुंबाच्या जीवाला धोका असल्याचे सांगून तातडीने पोलीस संरक्षण देण्याची विनंती केली आहे.
