बीड: बीडकरांचे दशकांपासूनचे स्वप्न अखेर पूर्णत्वास आले आहे. अहमदनगर-बीड-परळी रेल्वे मार्गाचा शुभारंभ आज मुख्यमंत्री देवेंद्र फडणवीस यांच्या हस्ते झाला. या प्रसंगी मंत्री पंकजा मुंडे यांनी आपल्या भावना व्यक्त करताना म्हटलं, ‘आज बीडच्या रेल्वे सेवेचा शुभारंभ होत आहे. या क्षणाच्या भावना शब्दांच्या पलीकडच्या आहेत. अनेक दशकांपासून आपण ज्याची प्रतीक्षा करत होतो, तो ऐतिहासिक क्षण अखेर आला आहे. पंतप्रधान नरेंद्र मोदी आणि मुख्यमंत्री देवेंद्र फडणवीस यांनी यासाठी विशेष तरतुदी करून दिल्याबद्दल त्यांचे आभार. तसेच या मार्गासाठी संघर्ष करणाऱ्या सर्वांचे मी मनापासून आभार मानते.’
नगर-बीड-परळी रेल्वे मार्गाची एकूण लांबी 261.25 किलोमीटर असून या प्रकल्पासाठी रेल्वे अर्थसंकल्पात 275 कोटी रुपयांची तरतूद करण्यात आली होती. मध्य रेल्वेचा हा एक महत्त्वाकांक्षी प्रकल्प मानला जातो. उद्घाटन सोहळ्यानंतर रेल्वे बीडहून अहिल्यानगरकडे रवाना झाली. कार्यक्रमात दिवंगत लोकनेते गोपीनाथ मुंडे यांचे फोटो झळकावले गेले आणि समर्थकांनी ‘मुंडे साहेब अमर रहे’च्या घोषणा दिल्या.
हेही वाचा – Beed News : अजित पवारांच्या ताफ्यासमोर दोन तरुणांचा आत्मदहनाचा प्रयत्न; बीडमध्ये खळबळ
दुसरीकडे शरद पवार गटाचे खासदार बजरंग सोनवणे यांच्या समर्थनार्थ ‘दबंग खासदार’ असे फलक लावण्यात आले. त्यामुळे या दोन नेत्यांच्या छायाचित्रांनी कार्यक्रमात विशेष लक्ष वेधून घेतले. उपमुख्यमंत्री अजित पवार, विविध पक्षांचे लोकप्रतिनिधी आणि नागरिकांच्या मोठ्या गर्दीत या ऐतिहासिक क्षणाला साक्षीदार झाले. बीड रेल्वे सेवेचा शुभारंभ हा केवळ वाहतूक सुविधा वाढवणारा टप्पा नसून बीडच्या विकासासाठी नवी दिशा दाखवणारा ऐतिहासिक क्षण ठरला आहे.
