पुणे: भारतीय जनता पक्षाला लवकरच नवा राष्ट्रीय अध्यक्ष मिळण्याची शक्यता आहे. पितृपक्ष संपल्यानंतर आणि बिहार विधानसभा निवडणुकीच्या आधी, नवरात्रीच्या सुमारास यावर निर्णय होऊ शकतो, अशी चर्चा आहे. उपराष्ट्रपती निवडणुकीनंतर पक्षातील जातीय समीकरणांमध्ये बदल झाला असून, आता संघाकडून अध्यक्षपदी ब्राह्मण चेहरा आणण्याची मागणी जोर धरत आहे.
गेल्या काही वर्षांत भाजपने विविध समाजघटकांना संधी दिली. दलित समाजातून आलेल्या रामनाथ कोविंद यांना राष्ट्रपती पद, तर आदिवासी समाजातून विद्यमान राष्ट्रपतींची निवड झाली. तसेच पंतप्रधान नरेंद्र मोदी आणि विद्यमान उपराष्ट्रपती सी. पी. राधाकृष्णन हे ओबीसी पार्श्वभूमीचे आहेत. त्यामुळे संघाकडून आता अध्यक्षपदी ब्राह्मण नेत्याला संधी मिळावी, अशी इच्छा व्यक्त केली जात आहे.
हेही वाचा – बीडकरांचं स्वप्न पूर्ण झालं! बीड रेल्वे सेवेला आज हिरवा झेंडा
भाजपच्या उच्चस्तरीय बैठकीत याबाबत चर्चा सुरू असून, विद्यमान अध्यक्ष जे. पी. नड्डा यांचे नाव पुन्हा चर्चेत आले आहे. संघटनेतील अनुभव, तसेच पंतप्रधान मोदी आणि गृहमंत्री अमित शहा यांच्याशी असलेला समन्वय लक्षात घेता, नड्डा यांना दुसऱ्या कार्यकाळासाठी संधी मिळण्याची शक्यता आहे. तांत्रिकदृष्ट्या त्यांचा पहिलाच कार्यकाळ पूर्ण झालेला मानला जात असल्याने, आणखी एका टर्मसाठी ते पात्र आहेत.
याशिवाय उत्तर प्रदेशचे माजी उपमुख्यमंत्री आणि राज्यसभेचे खासदार दिनेश शर्मा यांचे नावही शर्यतीत आहे. संघातून राजकारणात आलेले शर्मा यांनी पक्षात उपाध्यक्ष आणि गुजरात प्रभारी महासचिव म्हणून महत्त्वाची जबाबदारी सांभाळली आहे. लखनऊ महापौर पदाचा अनुभवही त्यांच्या खात्यात जमा आहे.
हेही वाचा – शरद पवारांवर देशद्रोहाचा गुन्हा दाखल करा; गोपीचंद पडळकरांचा जोरदार हल्लाबोल
दरम्यान, महाराष्ट्राचे उपमुख्यमंत्री देवेंद्र फडणवीस यांचे नावही अध्यक्षपदासाठी पुढे केले जात आहे. विधानसभा निवडणुकीतील कामगिरी, तसेच संघटनेला नव्या नेतृत्वाकडे वळवण्यासाठी फडणवीस यांना जबाबदारी दिली जाऊ शकते, अशी शक्यता व्यक्त केली जाते. जर त्यांच्याकडे अध्यक्षपद सोपवले गेले, तर बिहारसह इतर राज्यांच्या जबाबदाऱ्या महासचिवांकडे सोपवल्या जाऊ शकतात. एकंदरित, संघाच्या इच्छेला आणि पक्षाच्या धोरणात्मक गरजांना अनुसरून, भाजपचा पुढील अध्यक्ष कोण असेल याकडे संपूर्ण देशाचे लक्ष लागले आहे.
