Harish Daroda: आदिवासी विकास महामंडळाच्या कोट्यवधींच्या भात खरेदी घोटाळा प्रकरणात अटकेत असलेले हरेश दरोडा यांचा हृदयविकाराच्या झटक्याने मृत्यू झाला आहे. राष्ट्रवादी काँग्रेस (अजित पवार गट) पक्षाचे शहापूरचे आमदार दौलत दरोडा यांचे ते पुतणे होते. या घटनेमुळे शहापूर तालुक्यात आणि राजकीय वर्तुळात मोठी खळबळ उडाली आहे.
तुरुंगात प्रकृती खालावली
भात खरेदी गैरव्यवहार प्रकरणात अटक झाल्यानंतर हरेश दरोडा यांची रवानगी कारागृहात करण्यात आली होती. कारागृहात असतानाच त्यांना अचानक तीव्र हृदयविकाराचा झटका आला. प्रकृती गंभीर झाल्याने त्यांना तातडीने ठाणे जिल्हा शासकीय रुग्णालयात हलवण्यात आले, मात्र उपचारादरम्यान त्यांची प्राणज्योत मालवली.
काय होता १.६० कोटींचा घोटाळा?
२०२२-२३ मधील भात खरेदीत साकडबाव केंद्रामध्ये मोठ्या प्रमाणावर गैरव्यवहार झाल्याचा आरोप होता. तपासात असे समोर आले की, १३ हजार क्विंटलहून अधिक भात खरेदी झाल्याचे दाखवण्यात आले होते, पण प्रत्यक्षात ५ हजार १२० क्विंटल भात शिल्लकच नव्हता. शेतकऱ्यांच्या नावे बनावट पावत्या तयार करून सुमारे १ कोटी ६० लाख रुपयांचा अपहार झाल्याचे स्पष्ट झाले होते.
संबंधित कारवाई आणि आरोपी
याप्रकरणी किन्हवली पोलीस ठाण्यात गुन्हा दाखल करण्यात आला होता. साकडबाव आदिवासी सेवा सोसायटीचे अध्यक्ष म्हणून हरेश दरोडा यांच्यासह तत्कालीन प्रादेशिक व्यवस्थापक विजय गांगुर्डे, अविनाश राठोड आणि इतर तिघांवर कारवाई करण्यात आली होती. शहापूरचे उपप्रादेशिक व्यवस्थापक सागर सोनवणे यांच्या तक्रारीवरून ही पोलीस कारवाई झाली होती.
दरोडा यांनी आरोप फेटाळले होते
अटक होण्यापूर्वी हरेश दरोडा यांनी माध्यमांशी बोलताना घोटाळ्यातील आपला सहभाग नाकारला होता. “भात खरेदीचा थेट करार केंद्रप्रमुख जयराम सोगीर यांचा होता आणि त्यांनी या व्यवहाराची संपूर्ण जबाबदारी घेणारे हमीपत्रही दिले होते,” असा दावा दरोडा यांनी केला होता. मात्र, पोलिसांनी तपासानंतर त्यांना अटक केली होती.
