Satish Bhosale: तब्बल 1 वर्षाच्या कारावासानंतर निर्दोष मुक्तता झालेले भाजप आमदार सुरेश धस यांचे निकटवर्तीय सतीश भोसले उर्फ ‘खोक्या’ आपल्या गावी परतले आहेत. मात्र, घरी परतताच आपल्या डोळ्यादेखत उध्वस्त झालेला संसार आणि पाडलेले घर पाहून त्यांना अश्रू अनावर झाले. “माझ्यावर अन्याय झाला आणि आज माझे कुटुंब रस्त्यावर आले आहे,” अशी पहिली प्रतिक्रिया त्यांनी यावेळी दिली.
“सत्याचा विजय झाला, पण किंमत मोजावी लागली”
शिरूर कासार येथील आपल्या उध्वस्त झालेल्या ‘ग्लास हाऊस’च्या अवशेषांकडे पाहत सतीश भोसले यांनी प्रसारमाध्यमांशी संवाद साधला. ते म्हणाले, “माझा न्यायदेवतेवर पूर्ण विश्वास होता आणि आज सत्याचा विजय झाला आहे. पण गेल्या 1 वर्षात मी पूर्णपणे बरबाद झालो. ज्या घरासाठी आयुष्याची कमाई लावली, ते आज उरले नाही. लहान मुले आणि वृद्ध आई-वडिलांच्या डोक्यावरचे छतही हिसकावून घेतले गेले.”
नक्की काय घडले होते?
बीडमधील गाजलेल्या सरपंच देशमुख हत्या प्रकरणानंतर कायदा-सुव्यवस्थेचा प्रश्न निर्माण झाला असतानाच, सतीश भोसले यांचा एका तरुणाला बॅटने मारहाण करतानाचा व्हिडिओ समोर आला होता. या व्हिडिओची दखल घेत पोलिसांनी त्यांना अटक केली होती. याशिवाय ढाकणे पिता-पुत्राला मारहाण आणि वन्य प्राण्यांच्या शिकारीचे गुन्हेही त्यांच्यावर दाखल करण्यात आले होते. ते कारागृहात असतानाच, वनविभागाने अतिक्रमणविरोधी कारवाई करत त्यांचे आलिशान घर जमीनदोस्त केले होते.
टार्गेट केल्याचा आरोप
आपल्यावर झालेले आरोप खोटे असल्याचे सांगत भोसले म्हणाले, “तो व्हायरल व्हिडिओ चुकीच्या पद्धतीने मांडून मला जाणीवपूर्वक टार्गेट करण्यात आले. माझ्या गैरहजेरीत माझ्या कुटुंबावर अन्याय झाला.” दरम्यान, ढाकणे पिता-पुत्राला मारहाण केल्याच्या प्रकरणात कोर्टाने त्यांची निर्दोष मुक्तता केली असून, बॅट मारहाण प्रकरणात त्यांना जामीन मंजूर झाला आहे.
पुन्हा रिल्सची चर्चा
एकीकडे उध्वस्त घरामुळे भावूक झालेले सतीश भोसले चर्चेत असतानाच, दुसरीकडे कारागृहाबाहेर पडल्यानंतरचे त्यांचे नवीन ‘रिल्स’ सोशल मीडियावर पुन्हा एकदा व्हायरल होऊ लागले आहेत. आमदार सुरेश धस यांनी त्यांच्या अनुपस्थितीत कुटुंबाची भेट घेऊन पाठिंबा दिला होता, त्यामुळे आता राजकीय वर्तुळातही या सुटकेचे पडसाद उमटताना दिसत आहेत.
