Laxman Hake Car Attack: ओबीसी आरक्षणासाठी लढा देणारे आंदोलक लक्ष्मण हाके यांच्या गाडीवर अज्ञात तरुणांनी केलेल्या हल्ल्यामुळे खळबळ उडाली आहे. हा प्रकार अहिल्यानगर जिल्ह्यातील पाथर्डी तालुक्यात आरनगाव बाह्यवळण रस्त्यालगत घडला. हाके आज सकाळी दैत्य नांदूर (ता. पाथर्डी) येथे होणाऱ्या ओबीसी एल्गार सभेसाठी जात होते. प्रवासादरम्यान ते अहिल्यानगरजवळ नाश्ता करण्यासाठी थांबले. त्यानंतर प्रवास सुरू होताच आरनगावजवळ काही अज्ञात तरुणांनी त्यांचे वाहन अडवून काठ्यांनी हल्ला केला.
या हल्ल्यात वाहनाचे मोठे नुकसान झाले असून काचा फोडण्यात आल्या आहेत. मात्र, लक्ष्मण हाके यांना कोणतीही शारीरिक इजा झालेली नाही, अशी माहिती समोर आली आहे. घटनेनंतर पोलीस तातडीने घटनास्थळी दाखल झाले असून अज्ञात हल्लेखोरांविरुद्ध गुन्हा दाखल करण्याची प्रक्रिया सुरू आहे.
दरम्यान, हाके यांनी नुकतीच फेसबुकवर भावनिक पोस्ट केली होती. त्यात त्यांनी स्पष्ट केले होते की, ‘मी प्रामाणिकपणे ओबीसी भटक्या समाजाच्या हक्कांसाठी लढतोय. मोठे स्टेज, बॅनर किंवा पैसा नसतानाही लोकांनी मला पाठींबा दिला. पण या संघर्षात शत्रूंची संख्याही वाढत गेली आणि हल्ले होत राहिले. आता मात्र सहन होत नाही. उद्या दैत्य नांदूर येथे होणाऱ्या ओबीसी मेळाव्यानंतर माझी भूमिका स्पष्ट करेन.’
