LPG Cylinder Supply: मध्य-पूर्वेतील इस्रायल आणि इराण यांच्यातील संघर्ष महिनाभर लांबल्याने आशियाई देशांमधील इंधन पुरवठ्यावर परिणाम होऊ लागला आहे. या पार्श्वभूमीवर, भारताच्या पेट्रोलियम आणि नैसर्गिक वायू मंत्रालयाने स्थलांतरित कामगारांना दिलासा देण्यासाठी ५ किलोच्या ‘FTL’ (मुक्त व्यापार एलपीजी) सिलिंडर्सचा दैनंदिन पुरवठा दुप्पट करण्याचा महत्त्वपूर्ण निर्णय घेतला आहे. यामुळे सर्वसामान्यांना आणि स्थलांतरित मजुरांना इंधन टंचाईपासून मोठा दिलासा मिळणार आहे.
राज्यांना सतर्कतेचे आदेश; डॉ. नीरज मित्तल यांचे पत्र
पेट्रोलियम मंत्रालयाचे सचिव डॉ. नीरज मित्तल यांनी सर्व राज्य सरकारांना या संदर्भात विशेष पत्र लिहिले आहे. नागरी पुरवठा विभागाने तेल विपणन कंपन्यांच्या (OMCs) समन्वयाने हा वाढीव पुरवठा वेळेवर गरजूंपर्यंत पोहोचवण्याचे निर्देश देण्यात आले आहेत. मध्य-पूर्वेतील तणावामुळे निर्माण होणारी संभाव्य टंचाई टाळण्यासाठी केंद्र सरकारने ही सक्रिय पावले उचलली आहेत.
होर्मुझच्या सामुद्रधुनीतून ७ जहाजांचे भारतात आगमन
इराण आणि इस्रायलमधील तणावामुळे ‘होर्मुझच्या सामुद्रधुनी’त भारतीय जहाजे अडकल्याने चिंतेचे वातावरण होते. मात्र, आता ही परिस्थिती सुधारताना दिसत आहे. शिवालिक, नंदा देवी, जग वसंत यांसह एकूण सात एलपीजी टँकर्स ६,५०,००० टन गॅस घेऊन यशस्वीरित्या भारतात पोहोचले आहेत. भारताच्या एकूण एलपीजी गरजेपैकी ८५ ते ९० टक्के भाग आयातीवर अवलंबून असल्याने या जहाजांचे आगमन देशाच्या इंधन सुरक्षेसाठी अत्यंत महत्त्वाचे मानले जात आहे.
देशांतर्गत उत्पादनात ३६ टक्क्यांनी वाढ
आयातीमधील अडथळ्यांवर मात करण्यासाठी सरकारने देशांतर्गत एलपीजी उत्पादनात ३६ टक्क्यांनी वाढ केली आहे. सध्या देशात दररोज ५० लाख सिलिंडर्सचा पुरवठा केला जात असून पुरवठा साखळी अधिक भक्कम करण्यात आली आहे. इतर देशांकडूनही आयात वाढवण्याचे प्रयत्न सुरू असल्याने नागरिकांनी घाबरून जाण्याचे कारण नसल्याचे मंत्रालयाने स्पष्ट केले आहे.
