Udhampur Encounter: जम्मू-काश्मीरच्या उधमपूर जिल्ह्यात सुरक्षा दलांनी राबवलेल्या एका थरारक मोहिमेत जैश-ए-मोहम्मद (JeM) या दहशतवादी संघटनेच्या दोन पाकिस्तानी अतिरेक्यांचा खात्मा करण्यात आला आहे. बनसंतगडमधील जाफर जंगलात लपलेल्या या दहशतवाद्यांना बाहेर काढण्यासाठी भारतीय लष्कराने चक्क त्यांची ‘नैसर्गिक गुहा’च स्फोटाने उडवून दिली.
अशी झाली कारवाईची सुरुवात
मंगळवारी दुपारी रामनगरच्या घनदाट जंगलात भारतीय लष्कर, जम्मू-काश्मीर पोलीस आणि सीआरपीएफ (CRPF) यांच्या संयुक्त पथकाने शोधमोहीम सुरू केली होती. दुपारी ४ च्या सुमारास सुरक्षा दलांना एका नैसर्गिक गुहेत हालचाल जाणवली. भारतीय जवानांनी आव्हान देताच दहशतवाद्यांनी गोळीबार सुरू केला. सुरुवातीच्या चकमकीत एक दहशतवादी जखमी झाला होता, मात्र तरीही त्यांनी गुहेच्या आत आश्रय घेतला.
रात्रभर वेढा आणि ड्रोनची पाळत
संध्याकाळी ७:३० च्या सुमारास अंधाराचा फायदा घेऊन दहशतवाद्यांनी वेढा तोडून पळून जाण्याचा अयशस्वी प्रयत्न केला. मात्र, आधीच सावध असलेल्या जवानांनी त्यांना पुन्हा गुहेत ढकलले. दहशतवाद्यांनी आत्मसमर्पण करण्यास नकार दिल्यानंतर परिस्थिती हाताबाहेर जाऊ नये म्हणून लष्कराने पॅराट्रूपर्स, स्निफर डॉग्स आणि अत्याधुनिक थर्मल ड्रोन्स पाचारण केले होते.
निर्णायक हल्ला: गुहाच केली उद्ध्वस्त
बुधवारी सकाळी ‘ऑपरेशन किया’ अंतर्गत लष्कराने अंतिम प्रहार करण्याचे ठरवले. दहशतवादी गुहेच्या खोल भागात लपून सतत गोळीबार करत असल्याने थेट आत शिरणे धोकादायक होते. अखेर लष्कराने रणनीती बदलून गुहेचे प्रवेशद्वारच स्फोटकांनी उडवून दिले. या भीषण स्फोटात गुहेचा भाग कोसळला आणि दोन्ही दहशतवादी जागीच ठार झाले.
