किनगाव : किनगाव- गंगाखेड रोडवरील पुलाजवळच्या बाभळीच्या झाडावर दुचाकी आदळून खडी मशिनवरील मजुराचा उपचारादरम्यान अंबाजोगाई शासकीय रुग्णालयात शुक्रवारी (दि. १३) मृत्यू झाला. मृताच्या भावाच्या फिर्यादीवरून किनगाव पोलीस ठाण्यात घटनेची नोंद झाली आहे.
विठ्ठल तुकाराम मिटकर (वय २९, रा. पोखरी पो. पांगरी ता. लोहा जि. नांदेड) येथील मजूर पत्नीसह दहिफळे खडी मशीनवर कामाला होता. गुरुवारी (दि.१२) सांयकाळी ६.३० वा किनगाव येथून खडी मशीनकडे दुचाकी (एमएच.१२ बीई ५६८५) वरून जात असताना गाडीवरील ताबा सुटल्याने किनगाव जवळील पुराशेजारी असलेल्या बाभळीच्या झाडावर आदळली. यामध्ये तो गंभीर जखमी झाला. प्राथमिक उपचार किनगाव प्राथमिक आरोग्य केंद्रात करुन पुढील उपचारासाठी रुग्णालयात दाखल करण्यात आले होते.
उपचारदरम्यान शुक्रवार (दि १३) रोजी सांयकाळी मृत्यू झाला आहे. मयत मजूराचा भाऊ मारोती तुकाराम मिटकर यांच्या फिर्यादीवरून किनगाव पोलीस ठाण्यात घटनेची नोंद झाली आहे. पुढील तपास पोलिस उपनिरिक्षक जी. व्ही. तोटेवाड हे करीत आहेत.
