Neeraj Chopra: ऑलिंपिक सुवर्णपदक विजेता आणि भालाफेकपटू नीरज चोप्रा यांना भारतीय सैन्यात लेफ्टनंट कर्नल (मानद) पदवीने सन्मानित करण्यात आले आहे. ही प्रतिष्ठित पदवी संरक्षण मंत्री राजनाथ सिंह आणि लष्करप्रमुख जनरल उपेंद्र द्विवेदी यांच्या उपस्थितीत २२ ऑक्टोबर २०२५ रोजी साउथ ब्लॉक येथे झालेल्या पाइपिंग समारंभात प्रदान करण्यात आली. राजनाथ सिंह यांनी नीरज चोप्राला चिकाटी, देशभक्ती आणि उत्कृष्टतेसाठी झगडणाऱ्या भारतीय तरुणाईचे मूर्त रूप असे संबोधले. त्यांनी नीरजच्या कुटुंबीयांशी संवाद साधत या सन्मानाबद्दल अभिनंदनही केले.
भारतीय राजपत्रानुसार, नीरजची ही नियुक्ती १६ एप्रिल २०२५ पासून प्रभावी ठरली आहे. तो २६ ऑगस्ट २०१६ रोजी भारतीय सैन्यात नायब सुभेदार म्हणून रुजू झाला होता. क्रीडा क्षेत्रातील उत्तुंग कामगिरीसाठी त्याला २०१८ मध्ये अर्जुन पुरस्कार, २०२१ मध्ये खेलरत्न पुरस्कार, २०२२ मध्ये परम विशिष्ट सेवा पदक आणि २०२२ मध्ये पद्मश्री पुरस्कार प्रदान करण्यात आले होते.
हेही वाचा –नीरज चोप्राने 88.16 मीटर भालाफेक करून पॅरिस डायमंड लीग जिंकली
अलिकडच्या जागतिक अॅथलेटिक्स अजिंक्यपद स्पर्धेत नीरज ८४.०३ मीटरच्या थ्रोसह ८व्या स्थानावर राहिला. त्याचा सहकारी सचिन यादव ८६.२७ मीटरच्या थ्रोसह ४थ्या स्थानावर राहिला. नीरजने नंतर सांगितले की त्याला पाठीचा त्रास होता, परंतु तो पुढील आशियाई स्पर्धेत सुवर्णपदकावर लक्ष केंद्रित करत आहे. या स्पर्धेत त्याला पाकिस्तानच्या अर्शद नदीम कडून कडवे आव्हान मिळण्याची शक्यता आहे.
