Ashok Kharat Case: भोंदूबाबा अशोक खरात याच्याशी असलेल्या संबंधांच्या आरोपामुळे राज्य महिला आयोगाच्या अध्यक्षपदावरून पायउतार व्हाव्या लागलेल्या रुपाली चाकणकर यांच्यापुढील अडचणी थांबण्याचे नाव घेत नाहीत. आता त्यांना राष्ट्रवादी काँग्रेसच्या महिला प्रदेशाध्यक्षपदावरूनही हटवण्याच्या हालचाली सुरू झाल्या असून, पक्षांतर्गत विरोधाची धार तीव्र झाली आहे.
तटकरे-विखे ‘वर्षा’ बंगल्यावर
चाकणकरांना वाचवण्यासाठी राष्ट्रवादीचे ज्येष्ठ नेते खासदार सुनील तटकरे यांनी पुढाकार घेतल्याचे समजते. सूत्रांच्या माहितीनुसार, तटकरे यांनी राधाकृष्ण विखे पाटील यांच्यासह मुख्यमंत्री देवेंद्र फडणवीस यांची त्यांच्या निवासस्थानी भेट घेतली. या भेटीत चाकणकरांची पाठराखण करण्याचा प्रयत्न झाल्याची चर्चा राजकीय वर्तुळात रंगली आहे. मात्र, दुसरीकडे राष्ट्रवादीच्या आमदारांमध्येच या विषयावरून दोन तट पडले असून, त्यांच्या हकालपट्टीसाठी एक गट आग्रही आहे.
नाशिकमधून बंडाचे निशाण
चाकणकर यांच्याविरोधात नाशिक जिल्ह्यातील महिला पदाधिकाऱ्यांनी आक्रमक पवित्रा घेतला आहे. नाशिकमधील तालुका अध्यक्ष, जिल्हा अध्यक्ष आणि ओबीसी विभागाच्या अध्यक्षांनी त्यांच्या केवळ पदावरूनच नव्हे, तर पक्षातूनच हकालपट्टीची मागणी केली आहे. विशेष म्हणजे, पक्षातीलच एखाद्या बड्या नेत्याचा पाठिंबा असल्याशिवाय हे पदाधिकारी इतकी मोठी मागणी करू शकत नाहीत, असा तर्क लावला जात आहे.
रुपाली पाटील ठोंबरे यांचा थेट हल्ला
या वादात आता रुपाली पाटील ठोंबरे यांनीही उडी घेतली आहे. “राष्ट्रवादीत महिला सुरक्षित नाहीत आणि चाकणकरांच्या प्रकरणामुळे पक्षाची नाहक बदनामी होत आहे,” असा घणाघाती आरोप त्यांनी केला आहे. याच पार्श्वभूमीवर ठोंबरे आज उपमुख्यमंत्री सुनेत्रा पवार यांची भेट घेऊन महिला कार्यकर्त्यांचा संताप त्यांच्यासमोर मांडणार आहेत.
