BJP Maharashtra State Headquarter: मुंबईच्या चर्चगेट परिसरात आज भाजपच्या नवीन प्रदेश मुख्यालयाचे भूमिपूजन पार पडणार आहे. या कार्यक्रमाला केंद्रीय गृहमंत्री अमित शाह, उपमुख्यमंत्री देवेंद्र फडणवीस, तसेच प्रदेशाध्यक्ष रवींद्र चव्हाण आणि इतर वरिष्ठ नेते उपस्थित राहणार आहेत. मात्र या भूमिपूजनाआधीच शिवसेना (ठाकरे गट) चे खासदार संजय राऊत यांनी भाजपवर जोरदार हल्लाबोल केला आहे.
पत्रकार परिषदेत बोलताना राऊत म्हणाले, मरीन ड्राईव्हसमोर भाजपचे नवीन कार्यालय उभे राहते आहे, आणि त्याचे भूमिपूजन स्वतः अमित शाह करत आहेत. पण याच परिसरात मराठी भाषा भवनाचं काम वर्षानुवर्षं प्रलंबित आहे. भाजपचे दिल्लीतील मुख्यालय व्हाईट हाऊसलाही मागे टाकेल, पण मुंबईत मराठी भाषा भवनासाठी मात्र फाईल हलत नाही. भाजपच्या भूमिपूजनासाठी मात्र फाईल्स राफेलच्या वेगाने हलल्या.
हेही वाचा – Sanjay Raut : महापालिका निवडणुकीनंतर शिंदे गट भाजपमध्ये विलीन होणार? संजय राऊतांचा शिंदेंवर हल्लाबोल
राऊत यांनी पुढे प्रश्न उपस्थित केला की, छत्रपती शिवाजी महाराजांच्या स्मारकाचे काम अजूनही सुरू झालेले नाही, मात्र भाजपच्या पंचतारांकित मुख्यालयाचे उद्घाटन झपाट्याने होत आहे. अमित शाह प्रामाणिक माणूस आहेत. पण त्यांनी एकदा कुदळ मारली की या जमिनीमागचे सगळे रहस्य बाहेर येईल, असा टोला त्यांनी लगावला.
राऊतांचे अमित शाहांना पत्र
संजय राऊत यांनी अमित शाहांना या प्रकरणाबाबत सविस्तर पत्रही पाठवले आहे. या पत्रात त्यांनी आरोप केला आहे की, मरीन लाईन्सजवळील ही जागा भाजपने सत्तेचा आणि नियमांचा गैरवापर करून ताब्यात घेतली. त्यांच्या म्हणण्यानुसार, ही जागा मूळतः महापालिकेच्या निवासी उद्देशासाठी राखीव होती, परंतु फक्त 11 दिवसांत फाईल्स मंजूर करून ती भाजपच्या खात्यात जमा करण्यात आली. राऊतांच्या पत्रानुसार भूखंडातील 46 टक्के हिस्सा बँकांकडे गहाण ठेवण्यात आला होता. उर्वरित 54 टक्के भाग एकनाथ रिअल्टर्सने लीजवर घेतला आणि पुढे भाजपला हस्तांतरित केला. केवळ दोन महिन्यांच्या आत सर्व परवानग्या मिळवून 21 कोटी 25 लाख रुपयांत व्यवहार पूर्ण झाला. भाजपने त्यावर 8 कोटी 91 लाख रुपये शुल्क भरले आणि 31 मे 2025 रोजी हक्काचे हस्तांतरणही पूर्ण झाले. राऊतांच्या मते, एवढ्या वेगाने फाईल्स हलणे हे संशयास्पद असून, या संपूर्ण व्यवहाराची चौकशी गृहमंत्र्यांनी स्वतः करावी.
भूमिपूजन कार्यक्रम आज सायंकाळी
भाजपचे हे नवीन प्रदेश मुख्यालय मरीन ड्राईव्हजवळील निर्मला निकेतन परिसरात उभे राहणार आहे. अत्याधुनिक सुविधा, बैठकींसाठी स्वतंत्र कक्ष आणि प्रशासकीय कार्यालयांसह हे कार्यालय महाराष्ट्रातील भाजप संघटनेचे नवे केंद्र ठरणार आहे. मात्र, भूमिपूजनाच्या आधीच उठलेल्या या आरोपांमुळे आजच्या कार्यक्रमाकडे संपूर्ण राज्याचे लक्ष लागले आहे.
