Municipal Elections: महापालिका निवडणुकीसाठी महायुतीने आता आपली रणनीती आखण्यास सुरुवात केली आहे. स्थानिक पातळीवरील उमेदवार निवड, पदाधिकाऱ्यांमधील मतभेद आणि संघटनात्मक स्पर्धेमुळे भाजप व शिवसेना यांच्यात निर्माण झालेला तणाव आता निवळताना दिसत आहे. विरोधकांना फायदा होऊ न देता महापालिकांवरील सत्ता अधिक भक्कम करण्यासाठी दोन्ही पक्षांमध्ये समन्वय साधण्यात आला असून, येणाऱ्या स्थानिक स्वराज्य संस्थांच्या निवडणुका महायुतीच्या झेंड्याखालीच लढवल्या जाणार असल्याचे स्पष्ट संकेत मिळाले आहेत. भाजपचे प्रदेशाध्यक्ष रवींद्र चव्हाण यांनी शुक्रवारी यासंदर्भात अधिकृत भूमिका मांडली.
चव्हाण यांनी सांगितले की, सर्व महानगरपालिका निवडणुकांसाठी पक्षपातळीवर समित्या स्थापन करून महायुतीचे सूत्र निश्चित केले जाईल. जागावाटप करताना केवळ पक्षीय हित नव्हे, तर लोकहित आणि स्थानिक परिस्थितीचा विचार केला जाईल. या आघाडीत भाजप व शिवसेनेसोबत राष्ट्रवादी काँग्रेस, रिपब्लिकन पार्टी ऑफ इंडिया तसेच अन्य घटक पक्षांचाही समावेश राहणार आहे. नगरपालिका आणि नगर परिषद निवडणुकांच्या वेळी निर्माण झालेले मतभेद आता दूर करण्याचा प्रयत्न दोन्ही पक्षांकडून सुरू असल्याचेही त्यांनी सूचित केले. महायुतीतील अंतर्गत संघर्षाच्या पार्श्वभूमीवर उपमुख्यमंत्री एकनाथ शिंदे यांनी अलीकडेच केंद्रीय गृहमंत्री अमित शहा यांची भेट घेऊन तोडगा काढण्यासाठी पुढाकार घेतला होता. त्यानंतर भाजपच्या केंद्रीय नेतृत्वानेही मुख्यमंत्री देवेंद्र फडणवीस यांच्यासोबत चर्चा करून समन्वय वाढवण्यावर भर दिला होता.
नागपूर येथे झालेल्या पत्रकार परिषदेत चव्हाण यांनी पुढील निवडणुकांबाबत माहिती देताना सांगितले की, महापालिका आणि जिल्हा परिषद निवडणुकांसंदर्भात फडणवीस, शिंदे, बावनकुळे आणि स्वतःची संयुक्त बैठक झाली आहे. याशिवाय भाजपच्या कोअर कमिटीचीही चर्चा पार पडली. महानगरपालिका निवडणुका जानेवारीत होण्याची शक्यता असून, जिल्हा परिषद निवडणुकांबाबतचा आरक्षणाचा मुद्दा उच्च न्यायालयात प्रलंबित असल्याने त्या निवडणुका पुढे ढकलल्या जाण्याची शक्यता आहे.
हेही वाचा – Municipal Election: महापालिका निवडणुकांचे बिगुल लवकरच वाजणार; 15 डिसेंबरनंतर आचारसंहिता लागण्याची शक्यता
सलग चर्चांनंतर एकमत
हिवाळी अधिवेशनाच्या काळात महायुतीतील प्रमुख नेत्यांमध्ये बैठक झाली. त्यानंतर चव्हाण यांनी दिल्लीत जाऊन अमित शहा यांच्याशी चर्चा केली, तर लगेचच उपमुख्यमंत्री एकनाथ शिंदे यांच्याशीही संवाद साधण्यात आला. या चर्चांमधून जवळपास सर्व महापालिका निवडणुका एकत्र लढण्यावर सहमती झाल्याचे स्पष्ट झाले आहे.
मुंबईतही महायुतीचाच महापौर
दरम्यान, उपमुख्यमंत्री एकनाथ शिंदे यांनी मुंबईतील महापालिका निवडणुकांबाबत विश्वास व्यक्त केला आहे. विधानभवन परिसरात प्रसारमाध्यमांशी बोलताना त्यांनी सांगितले की, महायुती म्हणून एकत्र लढण्याचा निर्णय घेतला असून, त्याचा सकारात्मक परिणाम निवडणुकांमध्ये दिसेल. मुंबईत राबवलेल्या विकासकामांच्या जोरावर महायुतीला जनतेचा पाठिंबा मिळेल आणि महापौरही महायुतीचाच असेल, असा दावा त्यांनी केला. जागावाटपाबाबत अद्याप कोणताही अंतिम निर्णय झालेला नसून, स्थानिक समित्यांच्या चर्चेनंतर वरिष्ठ नेते अडचणी सोडवतील, असेही त्यांनी स्पष्ट केले.
