Middle East Conflict: मध्यपूर्वेतील तणाव शिगेला पोहोचला असून अमेरिकन लष्कराने इराणमधील इस्फहान शहरात असलेल्या एका मोठ्या दारूगोळा डेपोला लक्ष्य केले आहे. या मोहिमेत अमेरिकेने २,००० पौंडांच्या अत्यंत शक्तिशाली ‘बंकर-बस्टर’ बॉम्बचा वापर केल्याचे समोर आले आहे. या हल्ल्यामुळे इराणच्या सामरिकदृष्ट्या महत्त्वाच्या तळांचे प्रचंड नुकसान झाले असून, अमेरिकेचे राष्ट्राध्यक्ष डोनाल्ड ट्रम्प यांनी या घटनेचा एक धक्कादायक व्हिडिओ सोशल मीडियावर शेअर केला आहे.
ट्रम्प यांनी शेअर केला स्फोटांचा थरारक व्हिडिओ
डोनाल्ड ट्रम्प यांनी ‘Truth Social’ या आपल्या सोशल मीडिया प्लॅटफॉर्मवर एक व्हिडिओ पोस्ट केला आहे. या व्हिडिओमध्ये रात्रीच्या अंधारात भीषण स्फोट होताना आणि आकाशात प्रकाशाचे लोळ उठताना दिसत आहेत. या व्हिडिओला कोणतेही कॅप्शन देण्यात आलेले नाही, मात्र हा व्हिडिओ इस्फहानमधील हल्ल्याचाच असल्याचे मानले जात आहे. अमेरिकन अधिकाऱ्यांनी दिलेल्या माहितीनुसार, या हल्ल्यात मोठ्या प्रमाणात ‘पेनेट्रेटर’ (भेदक) शस्त्रास्त्रांचा वापर करण्यात आला आहे, ज्यामुळे जमिनीखालील अत्यंत सुरक्षित आणि अभेद्य मानल्या जाणाऱ्या सुविधा उद्ध्वस्त झाल्या आहेत.
इस्फहान शहराचे धोरणात्मक महत्त्व
इस्फहान हे शहर इराणच्या अण्वस्त्र आणि लष्करी कार्यक्रमाचे मुख्य केंद्र मानले जाते. राजधानी तेहरानच्या दक्षिणेस झायंदेह नदीकाठी वसलेल्या या शहरात इराणने आपले ‘अत्यंत समृद्ध युरेनियम’ (Highly Enriched Uranium) साठवून ठेवल्याचा आरोप आहे. अहवालांनुसार, सुमारे ५४० किलोग्रॅम युरेनियम या शहरातील जमिनीखालील गुप्त केंद्रांमध्ये हलवण्यात आले होते, ज्याला लक्ष्य करण्यासाठीच अमेरिकेने या विशेष बॉम्बचा वापर केला आहे.
ट्रम्प यांची इराणला थेट धमकी: ऊर्जा प्रकल्प लक्ष्य करणार
हल्ल्यानंतर राष्ट्राध्यक्ष ट्रम्प यांनी इराणला कडक शब्दांत इशारा दिला आहे. जर युद्ध संपवण्यासाठी लवकरच कोणताही करार झाला नाही आणि ‘हॉर्मुझ सामुद्रधुनी’ तेल वाहतुकीसाठी खुली केली गेली नाही, तर पुढील टप्प्यात इराणचे सर्व वीज प्रकल्प, तेलाच्या विहिरी आणि ‘खार्ग बेट’ पूर्णपणे नष्ट केले जाईल, अशी धमकी ट्रम्प यांनी दिली आहे. इतकेच नव्हे तर इराणमधील पाणी शुद्धीकरण प्रकल्पांनाही (Desalination Plants) लक्ष्य करण्याचा इशारा त्यांनी दिला आहे.
मध्यपूर्वेवर विनाशकारी परिणामांची भीती
अमेरिकेच्या या आक्रमक पवित्र्यामुळे आणि इराणने दिलेल्या प्रतिुत्तराच्या इशाऱ्यामुळे मध्यपूर्वेतील परिस्थिती गंभीर झाली आहे. आधीच पाणीटंचाईचा सामना करणाऱ्या या प्रदेशात जर पाणी आणि ऊर्जा प्रकल्पांवर हल्ले झाले, तर त्याचे परिणाम अत्यंत विनाशकारी असू शकतात. इराणने प्रत्युत्तर म्हणून शेजारील अरब राष्ट्रांच्या सुविधांना लक्ष्य केल्यास संपूर्ण जगाच्या तेल पुरवठ्यावर आणि अर्थव्यवस्थेवर याचे दूरगामी परिणाम होतील, अशी भीती व्यक्त केली जात आहे.
