सध्याच्या स्पर्धेच्या युगात अनेकजण पैसे कमावण्यासाठी प्रयत्न करतात. त्यात आजकाल लोकांच्या आयुष्यातील मोठा भाग ऑफिसमध्येच जातो. सकाळपासून संध्याकाळपर्यंत एकत्र काम केल्याने सहकाऱ्यांमधील मैत्री अधिक घट्ट होते आणि हळूहळू या नात्याचे प्रेमात रूपांतर होते. यामुळेच कामाचे ठिकाण आता केवळ काम करण्याचे ठिकाण न राहता, लोकांना जोडीदार शोधण्याचे ठिकाणही बनत आहे.
अलीकडील ‘वर्कप्लेस रोमान्स सर्व्हे’नुसार, ६० टक्क्यांहून अधिक लोकांनी त्यांच्या आयुष्यात कधी ना कधी ऑफिसमधील प्रेमाचा अनुभव घेतला आहे. इतकेच नाही, तर सर्वेक्षण केलेल्यांपैकी ४३ टक्के लोकांनी सांगितले की ऑफिसमध्ये सुरू झालेले नाते नंतर लग्नापर्यंत पोहोचले. यामागे आरामदायक वातावरण हे सर्वात मोठे कारण मानले जाते. जवळपास ६५ टक्के लोकांनी सांगितले की, दररोज एकत्र काम केल्याने आणि एकमेकांना अधिक चांगल्या प्रकारे समजून घेतल्याने नातेसंबंध निर्माण करणे सोपे जाते. तर दुसरीकडे, ६१ टक्के लोकांनी सांगितले की, कामाच्या व्यस्त वेळापत्रकामुळे त्यांना ऑफिसबाहेर नवीन लोकांना भेटता येत नाही.
ऑफिसमधील सहकारी एकमेकांचे व्यावसायिक जीवन, तणाव आणि दैनंदिन दिनचर्या अधिक चांगल्या प्रकारे समजून घेतात. यामुळेच अनेक लोक त्यांच्या सहकाऱ्यांशी पटकन भावनिक नाते निर्माण करतात. सर्वेक्षणातून हे देखील समोर आले आहे की, लोक केवळ कामाचा दिवस अधिक आनंददायी करण्यासाठी नातेसंबंधात येत नाहीत; तर त्यांच्या जोडीदाराने त्यांचे जीवन आणि काम दोन्ही समजून घ्यावे अशी त्यांची इच्छा असते.
