PMC Election 2025: पुणे महानगरपालिका सार्वत्रिक निवडणूक 2025 साठीची अंतिम प्रभाग रचना आता निश्चित झाली आहे. राज्य निवडणूक आयोगाने प्राधिकृत अधिकाऱ्यांच्या अहवालाच्या आधारे या अंतिम आराखड्यास मंजुरी दिली असल्याची माहिती महापालिकेचे उपयुक्त प्रसाद काटकर यांनी दिली. येत्या सोमवारपर्यंत ही अंतिम वॉर्ड रचना गॅझेटमध्ये प्रसिद्ध होणार आहे.
नागरिकांच्या हरकतींवर सविस्तर सुनावणी
महापालिकेने काही आठवड्यांपूर्वी प्रारूप प्रभाग रचना जाहीर केली होती. त्यावर नागरिकांना 4 सप्टेंबर दुपारी 3 वाजेपर्यंत हरकती आणि सूचना नोंदविण्याची मुदत देण्यात आली होती. शहरभरातून मोठा प्रतिसाद मिळाला असून, एकूण 5843 हरकती आणि सूचना प्राप्त झाल्या. नागरिकांनी प्रभागांची नावे बदलणे, नैसर्गिक हद्दीतील बदल, तसेच स्थानिक क्षेत्रीय संतुलन यांसारख्या विषयांवर आक्षेप घेतले होते.
प्राधिकृत अधिकाऱ्यांची सुनावणी आणि अहवाल
या सर्व हरकतींवर सुनावणीसाठी शासनाने अपर मुख्य सचिव (सामान्य प्रशासन विभाग) व्ही. राधा यांची प्राधिकृत अधिकारी म्हणून नियुक्ती केली होती. या सुनावण्या 11 आणि 12 सप्टेंबर रोजी झाल्या. सर्व आक्षेप आणि सूचना तपासल्यानंतर अधिकाऱ्यांनी आपला अंतिम अहवाल नगर विकास विभागाकडे पाठवला, ज्यात काही सुधारणा सुचवण्यात आल्या होत्या.
हेही वाचा – Nilesh Ghaywal : पुणे पोलीस निलेश घायवळला फरफटत भारतात आणणार? आयुक्तांनी उचललं मोठं पाऊल
अंतिम आराखड्याला मंजुरी
या अहवालाचा आढावा घेतल्यानंतर राज्य निवडणूक आयोगाने अंतिम प्रभाग रचनेस अधिकृत मान्यता दिली. त्यामुळे पुणे महानगरपालिका निवडणुकीच्या प्रक्रियेला आता गती मिळण्याची शक्यता आहे. महापालिका प्रशासनाकडून मिळालेल्या माहितीनुसार, सोमवारपर्यंत गॅझेट अधिसूचना प्रसिद्ध करण्यात येईल आणि त्यानंतर निवडणुकीची तयारी अधिकृतपणे सुरू होईल.
