ZP Election Date: गेल्या अनेक वर्षांपासून रखडलेल्या राज्यातील जिल्हा परिषद आणि पंचायत समिती निवडणुकांबाबत मोठी बातमी समोर येत आहे. सूत्रांकडून मिळालेल्या माहितीनुसार, या निवडणुकांसाठी ५ फेब्रुवारी २०२६ रोजी मतदान होण्याची दाट शक्यता आहे. राज्य निवडणूक आयोगाची आज सायंकाळी ४ वाजता महत्त्वपूर्ण पत्रकार परिषद होणार असून, यामध्ये निवडणुकीच्या तारखांची अधिकृत घोषणा होऊन आजपासूनच आचारसंहिता लागू होण्याचे संकेत आहेत.
सर्वोच्च न्यायालयाचा निवडणूक आयोगाला दिलासा
स्थानिक स्वराज्य संस्थांच्या निवडणुका ३१ जानेवारीपर्यंत पूर्ण करण्याचे निर्देश सर्वोच्च न्यायालयाने दिले होते. मात्र, निवडणूक आयोगाने तयारीसाठी वाढीव मुदत मागितली होती. सोमवारी न्यायालयाने आयोगाची ही विनंती मान्य करत १५ दिवसांची मुदतवाढ दिली आहे. या निर्णयामुळे आता निवडणुकांचा मार्ग मोकळा झाला असून प्रशासकीय हालचालींना वेग आला आहे
आज सायंकाळी ‘सह्याद्री’वर पत्रकार परिषद
मुंबईतील सह्याद्री अतिथीगृह येथे आज सायंकाळी ४ वाजता राज्य निवडणूक आयोगाची पत्रकार परिषद पार पडणार आहे. या परिषदेत निवडणुकीचे सविस्तर वेळापत्रक, टप्पे आणि आचारसंहितेबाबत सविस्तर माहिती दिली जाईल.
