मुंबई: मुंबई महानगरपालिकेच्या रुग्णालयांमधील व्यवस्थापन सुधारण्यासाठी महत्त्वाची पावले उचलण्यात येत आहेत. नागरिकांच्या अनेक तक्रारींनंतर आता रुग्णालयांतील विविध सेवा माहिती पालिकेच्या पोर्टल आणि चॅटबॉटद्वारे उपलब्ध होणार आहे. महापालिकेच्या आरोग्य विभागानुसार, कूपर रुग्णालयात प्रायोगिक तत्त्वावर सुरु केलेला आरोग्य व्यवस्थापन माहिती प्रणाली (एचएमआयएस) प्रयोग यशस्वी ठरल्यावर ही सुविधा अन्य रुग्णालयांमध्येही उपलब्ध करून दिली जाणार आहे. यामध्ये नागरिकांना एका क्लिकवर रुग्णालयात उपलब्ध बेडची संख्या, बाह्यरुग्ण (ओपीडी) वेळापत्रक, रुग्णवाहिकांची उपलब्धता याबाबत माहिती मिळणार आहे.
दरम्यान, गुरुवारी कूपर रुग्णालयात झालेल्या संवादसत्रात महापालिकेचे आरोग्य विभागाचे उपायुक्त शरद उघाडे आणि नायर रुग्णालयाचे अधिष्ठाता संजय मोहिते उपस्थित होते. यावेळी बाळासाहेब ठाकरे ट्रॉमा केअर, इतर रुग्णालयातील सेवा सुविधा, मनुष्यबळ, झीरो प्रिस्क्रिप्शन योजना आणि भविष्यातील वैद्यकीय सेवा यावर चर्चा झाली.
हेही वाचा – Pune Traffic: आता पुणेकरांची वाहतूक कोंडीतून होणार सुटका; AI आधारीत प्रकल्पामुळे सुटणार ट्राफिक जामची समस्या
एचएमआयएस प्रणाली रुग्णालयातील रुग्णांचा डेटा गोळा करून त्याचे विश्लेषण करते आणि प्रशासकीय निर्णय घेण्यास मदत करते. ही सॉफ्टवेअर प्रणाली रुग्णालयांच्या कामकाजात सुधारणा करते. तसेच ही प्रणाली केईएमसह इतर चार महापालिका रुग्णालयांतही प्रायोगिक तत्त्वावर सुरू केली जाणार आहे.
यासोबतच, कूपर रुग्णालयात येत्या तीन महिन्यांत किमोथेरपी सेंटर सुरू होणार आहे. नायर कॅन्सर रुग्णालयाच्या 10 मजली इमारतीत 6 मजल्यापर्यंत बांधकाम पूर्ण झाले असून, ऑक्टोबर 2026 पर्यंत संपूर्ण बांधकाम पूर्ण होण्याची अपेक्षा आहे. या सुधारणा महापालिका रुग्णालयांची कार्यक्षमता वाढवतील आणि नागरिकांना वेगवान, सुलभ आणि पारदर्शक सेवा मिळण्यास मदत करतील.
