Jain Community Morcha: जैन समाजाने ‘जीव दया आणि कबुतर बचाव’ या मोहिमेला बळ देण्यासाठी येत्या 7 डिसेंबर रोजी भव्य मोर्चाचे आयोजन केले आहे. जैन मुनी निलेशचंद्र विजय महाराज यांच्या मार्गदर्शनाखाली हा आंदोलनात्मक उपक्रम राबवण्यात येणार आहे. मोर्चाची सुरुवात कुलाबा जैन मंदिरातून होणार असून लालबाग, भायखळा, डोंगरी, लोअर परळ अशा प्रमुख ठिकाणांमधून जात तो दादर कबुतरखाना आणि इतर मुख्य जैन मंदिरांपर्यंत पोहोचणार आहे.
समाजात जनजागृतीसाठी प्रवचन व कार्यक्रमांची आखणी
या यात्रेदरम्यान समाजातील लोकांना मोहीमेची माहिती देण्यासाठी प्रवचन, संवाद-सत्रे आणि विविध धार्मिक उपक्रमांचे आयोजन करण्यात येणार आहे. आंदोलनाला व्यापक पाठिंबा मिळावा यासाठी समाजातील सर्व घटकांना एकत्र येण्याचे आवाहनही केले जाणार आहे. विशेष म्हणजे, सरकारचं लक्ष वेधण्यासाठी निलेशचंद्र महाराज दादरमध्ये पुन्हा अनशन करण्याची तयारी करत असल्याचीही माहिती समोर आली आहे.
हेही वाचा – Dadar Kabutarkhana : डॉक्टर मूर्ख, एक-दोन जण मेल्यानं काय होतं?; जैन धर्मसभेत कैवल्य रत्न महाराज बरळले
समाजाला तोडणाऱ्यांना सोडणार नाही – निलेशचंद्र महाराज
एबीपी माझाच्या ‘महाकट्टा’ कार्यक्रमात सहभागी होताना निलेशचंद्र विजय महाराजांनी मंदिर पाडकाम, समाजावरील अन्याय आणि राजकीय दुटप्पीपणावर कठोर शब्दांत नाराजी व्यक्त केली. ते म्हणाले, जैन धर्म हजारो वर्षांचा आहे; आमच्या समाजाने कधीच इतरांचे मंदिर किंवा घरे तोडून जैनालय उभारले नाही. आम्ही शांतिप्रिय आहोत. पण विलेपार्लेतील आमचे मंदिर बुलडोझरने पाडले गेले. मग अवैध मशिदींवर कारवाई का झाली नाही? जे समाजात फूट पाडतात, ते कोणाचेही असोत, त्यांना आम्ही सोडणार नाही. महाराजांनी पुढे सांगितले की काही नेत्यांनी तडजोडीचे आश्वासन दिले, परंतु त्यातून कोणताच निकाल निघाला नाही. माझे प्राण गेले तरी चालतील, पण समाजाला न्याय मिळेपर्यंत मी थांबणार नाही.
जैन समाजाची स्वतःची पार्टी का नसावी?
आगामी निवडणुकांमध्ये राजकीय सहभागाबाबत विचारले असता निलेशचंद्र महाराजांनी स्पष्ट संकेत दिले की जैन समाजाने आपली स्वतंत्र राजकीय शक्ती उभारण्याची वेळ आली आहे. ते म्हणाले, प्रत्येक समाजाची स्वतःची राजकीय ताकद आहे, मग जैन समाजाची का नसावी? अनेकदा आमच्या प्रश्नांसाठी आम्हाला वेगवेगळ्या दरवाज्यांवर जावे लागते. आम्ही शांत, गैरविवादित समाज आहोत, पण अन्याय झाल्यास आमच्यासाठीही आवाज उठवावाच लागतो.
